Blogerët rusë të luftës – figura në lojën politike?

Kjo nuk është hera e parë që blogerët e luftës pro-ruse të krahut të djathtë kanë kritikuar paaftësinë e ushtrisë ruse. Këtë herë shkak është bërë sulmi ukrainas në të cilin sipas Rusisë kanë humbur jetën 89 ushtarë rusë. Këta blogerë lufte përdorin kryesisht platformën Telegram. Një postim në “Grey Zone”, një kanal Telegram që i atribuohet ushtrisë private “Group Wagner”, thotë:

“Siç pritej, pas ngjarjeve në Makeyevka, filluan të fajësojnë ushtarët. Sepse i kanë ndezur celularët dhe kështu janë marrë vesh. Sigurisht që armiku i ka këto mundësi dhe ndonjëherë i përdor. Por, në këtë rast, 99% e saj është një gënjeshtër dhe një përpjekje për të hequr të gjithë fajin nga vetja”.

Paaftësia e udhëheqjes ushtarake ruse

Gjeneralët rusë janë thelbësisht të paaftë për të marrë këshilla, thotë Igor Girkin, një ish-spiun rus dhe i vetëshpallur nacionalist, i cili u dënua nga një gjykatë holandeze në dhjetor 2022 për vrasje masive për rolin e tij në rrëzimin e aeroplanit të pasagjerëve malajzian MH17 mbi Ukrainën lindore në vitin 2014.

Girkin shkruan në profilin e tij në Telegram se ndërtesa ku ishin vendosur ushtarët është shkatërruar plotësisht, pasi përdorej edhe si depo municioni.

Boris Roshin, një bloger lufte e krahut të djathtë dhe autor i “Colonelcassad”, kritikon faktin se shumë ushtarë janë të vendosur në një zonë brenda rrezes së artilerisë ukrainase. Gjatë muajve të fundit, ushtria ka përshtatur strategjinë e saj me situatën në terren, në mënyrë që sasi të mëdha municionesh dhe karburantesh të mos ruhen në një vend. Por, thotë Roshin, kjo nuk vlen për njerëzit. Për këtë është përgjegjës kryesia ushtarake ruse. “Paaftësia dhe pamundësia për të kuptuar pasojat e një lufte është ende një problem serioz”, thotë Roshin.

Kritikat e ashpra ndaj kryesisë ushtarake ruse për dështimin në drejtimin e luftës nuk janë asgjë e re për nacionalistët rusë. Blogerët pro-rus të luftës kanë postuar kritika të ashpra për muaj të tërë. Por vala e fundit e kritikave ndaj ministrisë së mbrojtjes në Moskë ngre pyetjen se pse një kritikë e tillë tolerohet në Rusi, e cila po bëhet gjithnjë e më autoritare.

Blogerët që mbrojnë luftën janë të lirë të shprehin mendimet e tyre. Kundërshtarët e luftës përballen me 15 vjet burg për akuzat e “diskreditimit të ushtrisë ruse” ose përhapjes së “lajmeve të rreme” për ushtrinë ruse dhe aktivitetet e saj.

Moska nuk mund ta kontrollojë plotësisht narrativën

Drejtimi i kritikës është vendimtar, shpjegon Abbas Galyamov, një analist politik dhe ish-shkrues i fjalimeve për Vladimir Putin.

“Blogerët e luftës kritikojnë nga një këndvështrim i ashtuquajtur patriotik: ata nuk sulmojnë Putinin, por ata që kryejnë veprimet. Ata nuk vënë në dyshim lidershipin e Putinit apo idenë e tij për pushtimin e Ukrainës.” Ai shton se nëse dikush vë në dyshim lidershipin e Putinit ose luftën, ai shihet si një “armik”.

Por Igor Girkin, një nga kritikët më të shquar të ushtrisë ruse, e ka kritikuar vazhdimisht Putinin. Në një video 90-minutëshe të postuar në Telegram në dhjetor, Girkin tha se koka e peshkut ishte thyer plotësisht.

Historiani britanik dhe eksperti i Rusisë Mark Galeoti thotë se Moska po kupton gjithnjë e më shumë se nuk mund ta kontrollojë plotësisht narrativën. Sipas Galeoti, njerëz si Girkin janë, në njëfarë kuptimi, lajmëtarë të rrymave të rëndësishme në aparatin ushtarak dhe të sigurisë. Ekziston frika se ata mund të bëhen dëshmorë nëse shtypen. Për më tepër, nuk do të kishte asnjë shans për të marrë një përshtypje të vërtetë se cilat janë saktësisht qëllimet e tyre.

A është ky një veprim shahu politik?

Putini është gjithashtu i pakënaqur me udhëheqjen e tij ushtarake, thotë Abbas Galyamov. Atij iu premtua fitorja për tre ditë, përkundrazi ai e ka turpëruar veten para gjithë botës”. Në një nivel emocional, edhe blogerët e kuptojnë Putinin, thotë ky analist politik rus.

Duke pasur parasysh luftën për pushtet brenda elitës ruse, kritikat janë sigurisht të motivuara politikisht. Galeoti beson se jo të gjithë oficerët e lartë rusë mbështesin ministrin e Mbrojtjes Sergei Shoigu dhe shefin e Shtabit të Përgjithshëm Valery Gerasimov. Ka mundësi që këta persona të duhet të japin dorëheqje këtë vit, thotë ai. “Ajo që shohim në mediat sociale është një pasqyrim i një pjese të mirë të politikës reale në Rusi”, thekson historiani britanik Galeoti./dw/