Ukraina ka përgatitur tre dokumente të reja për propozimet e paqes që do t’i dërgohen administratës Trump

Presidenti i Ukrainës, Volodymyr Zelensky, tha të martën se Kievi ka përfunduar tre dokumente kyçe që do t’i paraqiten administratës së presidentit amerikan Donald Trump, si pjesë e përpjekjeve të vazhdueshme diplomatike për t’i dhënë fund luftës së nisur nga Rusia.

Deklarata vjen pas një periudhe të tensionuar negociatash dhe pas publikimit të një plani paqeje prej 28 pikash, i hartuar nga zyrtarë amerikanë me kontribut të Kremlinit, i cili shkaktoi reagime të ashpra në Ukrainë dhe në Evropë.

Plani fillestar propozonte që Ukraina të hiqte dorë nga anëtarësimi në NATO, të reduktonte forcat e saj të armatosura dhe të dorëzonte territore që Rusia nuk ka arritur t’i pushtojë në fushën e betejës.

Duke folur në një konferencë shtypi online më 9 dhjetor, Zelensky tha se dokumenti i parë i pakos përbëhet nga një “kornizë” me 20 pika, e cila do të pasqyrojë qëndrimet dhe interesat ukrainase dhe perëndimore.

“Është në ndryshim të vazhdueshëm dhe kjo është normale, sepse është një strukturë e gjallë që duhet të pasqyrojë interesat e Ukrainës, Evropës dhe botës”, theksoi ai.

Ky dokument synon të ofrojë alternativë ndaj versionit fillestar të planit amerikan, të konsideruar prej Kievi si tepër i favorshëm për Rusinë.

Dokumenti i dytë trajton garancitë e sigurisë për Ukrainën në rast të një armëpushimi. Zelensky konfirmoi se për këtë pjesë po diskuton si me Shtetet e Bashkuara, ashtu edhe me Koalicionin e të Gatishmëve – grup vendesh kryesisht evropiane që mbështesin Ukrainën me asistencë të ndryshme sigurie.

“Garancitë e sigurisë janë një dokument i rëndësishëm midis nesh dhe Shteteve të Bashkuara, dhe midis nesh dhe evropianëve”, u shpreh presidenti ukrainas.

Sipas tij, ky dokument është kyç për të siguruar që çdo marrëveshje armëpushimi të mos e lërë Ukrainën të pambrojtur përballë një sulmi të ri rus.

Dokumenti i tretë lidhet me rimëkëmbjen ekonomike të Ukrainës pas luftës. Zelensky nuk dha detaje, por theksoi se është një pjesë thelbësore e paketës që do t’i dorëzohet Washingtonit.

Më herët gjatë javës, presidenti ukrainas u takua me liderët evropianë në Bruksel dhe Londër për të diskutuar rishikimet e planit të SHBA-së, duke kërkuar që ai të jetë i drejtë dhe i zbatueshëm për Ukrainën.

Të martën, presidenti amerikan Donald Trump komentoi procesin e negociatave, duke deklaruar se presidenti ukrainas “do të duhet të marrë përsipër topin dhe të fillojë t’i pranojë gjërat”.

Trump, i cili prej kohësh pretendon se ka zgjidhur “mbi tetë konflikte në botë”, është i interesuar të forcojë imazhin e tij si paqebërës duke arritur një armëpushim në Ukrainë.

Analistët paralajmërojnë se sfida kryesore për Kievin dhe partnerët e tij është të kuptojnë se çfarë lloj “paqjeje” do të sjellë plani i Trumpit – dhe për sa kohë do të jetë e qëndrueshme.

Në një situatë ku Rusia vazhdon agresionin dhe territori ukrainas mbetet i pushtuar pjesërisht, çdo marrëveshje që kërkon lëshime të njëanshme mund të ketë pasoja afatgjata për sigurinë e Ukrainës dhe stabilitetin e Evropës.

Propozimet e reja pritet t’i dorëzohen formalist administratës amerikane në ditët dhe javët në vijim./TheGeopost.