Çerimagiq: Përmes Vulinit, Serbia promovon mbështetjen ruse për Vuçiqin dhe projektin e “Botës Serbe”

Në deklaratat e publikuara nga Çerimagiq, Vulin vlerëson mbështetjen e presidentit rus, Vladimir Putin, për presidentin serb Aleksandar Vuçiq, duke theksuar veçanërisht deklaratën e Putinit se serbët janë “një popull i ndarë padrejtësisht” në shtete të ndryshme.

Sipas Vulinit, kjo nuk përbën vetëm mbështetje për Vuçiqin, por edhe për idenë e bashkimit të serbëve.

“Kjo nuk ishte vetëm mbështetje për presidentin Vuçiq. Është mbështetje për konceptin e ‘Botës Serbe’, është mbështetje për bashkimin e serbëve”, ka deklaruar Vulin.

Ai ka thënë se ndryshimet në botë kanë krijuar rrethana të reja dhe se bashkimi i serbëve, të cilin e përshkruan si të paimagjinueshëm deri vonë, tani është i mundur.

“Bota po ndryshon. Ajo që deri dje ishte e paimagjinueshme, që serbët të bashkohen, tani është shumë e imagjinueshme”, ka thënë Vulin.

Sipas deklaratave të publikuara nga Çerimagiq, Vulin e ka lidhur këtë synim edhe me kandidaturën e tij për president të Serbisë.

“Na takon neve dhe këtij brezi të politikanëve të bëjmë gjithçka për ta kthyer në realitet atë mbështetje nga presidenti Putin, atë mbështetje të zëshme për unitetin e popullit serb”, ka deklaruar ai.

Vulin ka paraqitur edhe një rrugë politike për realizimin e këtij synimi. Sipas tij, fillimisht Serbia duhet të votojë për listën e udhëhequr nga Vuçiqi, ndërsa më pas duhet të zgjedhë një president “me guximin për të luftuar për Botën Serbe, përmes bashkimit të të gjithë serbëve”.

Ai ka lënë të kuptohet qartë se këtë rol synon ta marrë vetë, duke e paraqitur kandidaturën e tij presidenciale si pjesë të përpjekjes për realizimin e këtij koncepti.

Çerimagiq, thekson se Serbia përmes Vulinit dhe mbështetjes ruse vazhdon të çojë përpara idenë e bashkimit të serbëve në kuadër të konceptit të “Botës Serbe”.