Propagandë për fëmijë: Shkollat ​​ruse do të shfaqin 83 filma për luftën

Autoritetet ruse kanë nisur zbatimin e një formati të ri të edukimit “patriotik” në shkolla, ku nxënësve do t’u shfaqen 83 filma të shkurtër biografikë, përfshirë edhe materiale për pjesëmarrësit rusë në luftën kundër Ukrainës.

Sipas ministrit rus të Arsimit, Sergei Kravtsov, filmat do t’u shfaqen nxënësve nga klasa e gjashtë deri në të njëmbëdhjetën, në kuadër të orëve të njohura si “Biseda për gjërat e rëndësishme”. Më vonë, të njëjtat materiale pritet të përdoren edhe për nxënësit e klasës së pestë në kuadër të lëndës “Kultura shpirtërore dhe morale e Rusisë”.

Kravtsov ka deklaruar se janë realizuar gjithsej 83 filma, përfshirë materiale për figura që, sipas tij, “bashkojnë vendin”, pjesëmarrës në atë që Moska e quan “operacion special ushtarak”, veteranë të Luftës së Dytë Botërore dhe figura të tjera historike e kulturore.

Sipas autoriteteve ruse, synimi është që nxënësit të njihen me figura që konsiderohen shembuj patriotizmi dhe të diskutojnë për cilësitë që duhet të marrin si model.

Megjithatë, media dhe organizata kritike ndaj Kremlinit e shohin këtë politikë si pjesë të militarizimit dhe indoktrinimit ideologjik të fëmijëve, veçanërisht për faktin se në mesin e figurave të promovuara janë edhe pjesëmarrësit në luftën kundër Ukrainës.

Kjo qasje është pjesë e një strategjie më të gjerë të Kremlinit për ta paraqitur luftën si pjesë normale të jetës publike dhe për ta promovuar pjesëmarrjen në të si model të pranueshëm për brezat e rinj.

Programi i ri ka nisur të zbatohet gjatë vitit shkollor 2026/27 në shkollat dhe kolegjet ruse.