Vuçiqi paralajmëron “kupolën mbrojtëse” dhe forcimin e ushtrisë për marketing politik

Presidenti i Serbisë, Aleksandar Vuçiq, ka paralajmëruar “forcimin e ushtrisë” dhe ndërtimin e të ashtuquajturës “kupolë mbrojtëse” mbi Serbi, duke u thirrur në frikën nga një luftë e mundshme midis Evropës dhe Rusisë. Megjithatë, pas kësaj retorike duket se fshihet më shumë marketing politik dhe përpjekje për të zhvendosur vëmendjen nga problemet ekonomike dhe shoqërore në vend, sesa një kujdes real për sigurinë e Serbisë.

Ndërsa presidenti serb flet për “mbrojtjen e vendit”, në realitet gjendja në industrinë ushtarake të Serbisë është alarmante. Sipas informatave nga Asociacioni i Sindikatave të Lira dhe të Pavarura, në fabrikat e armëve po përgatiten listat e punëtorëve që do të shpallen tepricë teknologjike.

Analisti ushtarak Aleksandar Radiq thekson se depot janë të mbushura për shkak të ndalimit të eksportit që e ka vendosur vetë Vuçiqi, ndërsa fabrika si “Zastava oružje” në Kragujevc mezi po mbijetojnë.

Loja e dyfishtë me Perëndimin dhe Moskën

Në të njëjtën kohë që në Serbi flet për “pavarësi dhe neutralitet”, Vuçiqi i ofron Evropës rezerva municionesh për eksport dhe deklaron se “nuk ka problem nëse municioni serb përfundon në Ukrainë”.

Këto deklarata kanë shkaktuar reagime të ashpra në Moskë – zëdhënësja e Ministrisë së Jashtme ruse, Maria Zaharova, ka kujtuar se “Beogradi është zotuar që armët serbe të mos dërgohen në Ukrainë” dhe e ka akuzuar Vuçiqin se “flet ndryshe në Rusi e ndryshe në Evropë”.

Retorika e frikës si armë politike

Duke folur për “përgatitje për luftë” dhe “kupolë mbrojtëse”, Vuçiqi po përhap një narrativë frike që i mundëson forcimin e kontrollit mbi institucionet dhe zhvendosjen e vëmendjes publike nga problemet e brendshme.

Në një kohë kur në Serbi po pushohen punëtorë, fabrikat po ngelen pa punë, ndërsa qytetarët përballen me rritjen e çmimeve dhe varfërinë, presidenti në vend të zgjidhjeve konkrete ofron militarizim dhe parulla boshe patriotike.