Vuçiq dhe Lavrov bisedojnë për Kosovën dhe Republikën Sërpska – përpjekje të reja për koordinim mes Beogradit dhe Moskës

Presidenti i Serbisë, Aleksandar Vuçiq, ka zhvilluar një bisedë telefonike me ministrin e Jashtëm të Federatës Ruse, Sergei Lavrov, në të cilën janë trajtuar çështje me ndjeshmëri të lartë rajonale – përfshirë Kosovën dhe entitetin serb në Bosnjë e Hercegovinë, Republika Sërpska.

Sipas mediave serbe dhe ruse, biseda është zhvilluar me iniciativën e palës serbe.

Në deklaratën zyrtare thuhet se është dhënë një “vëmendje e veçantë” situatës në Kosovë dhe në Bosnjë e Hercegovinë, duke u theksuar rëndësia e Rezolutës 1244 dhe Marrëveshja e Dejtonit.

Kjo qasje bie ndesh me realitetin politik dhe juridik të tanishëm në rajon. Kosova është një shtet sovran dhe i pavarur, i njohur nga shumica e vendeve perëndimore dhe demokratike.

Përdorimi i Rezolutës 1244 nga ana e Rusisë dhe Serbisë vazhdon të jetë pjesë e narrativave të tyre për të minuar legjitimitetin ndërkombëtar të shtetit të Kosovës.

Në të njëjtën kohë, përmendja e Republikës Sërpska në bisedën Vuçiq-Lavrov ngre shqetësime për përpjekjet destabilizuese që kërcënojnë rendin kushtetues të Bosnjë e Hercegovinës. Nxitja e nacionalizmit serb në rajon, në koordinim me Rusinë, është parë shpesh si instrument për të rritur tensionet dhe për të penguar proceset integruese euroatlantike në Ballkanin Perëndimor.

Vuçiq dhe Lavrov po ashtu diskutuan për “bashkëpunimin strategjik” ndërmjet dy vendeve, si dhe për koordinim në platformat ndërkombëtare — një sinjal i vazhdimësisë së afërsisë mes Beogradit dhe Moskës, pavarësisht izolimit ndërkombëtar të Rusisë pas agresionit të saj në Ukrainë./The Geopost/