Vuçiq akuzon edhe bullgarët për “revolucionin me ngjyra”

As Bullgaria nuk i ka shpëtuar propagandës së regjimit të presidentit të Serbisë, Alekaandër Vuçiq. Së fundmi Beogradi është marrë me studiues dhe diplomatë bullgarë të cilët në një film që është transmetuar në Bullgari, paraqiten të jenë pjesë e një rrjeti të fuqishëm spiunazhi që “merr pjesë në organizimin e një ‘revolucioni me ngjyra’”.

Në episodin e parë të titulluar “Komploti Universitar”, Bullgaria përmendet e para si shtet që merr pjesë në “shkatërrimin institucional dhe dehumanizimin” e Aleksandër Vuçiqit. Në shënjestër është vënë rektori i Universitetit të Beogradit, Vladan Gjokiq, i cili përshkruhet me terma poshtërues, shkruan BGNES.

Në filmin që paraqitet gjoja si investigativ, Gjokiq konsiderohet si lideri kryesor i protestave kundër regjimit të Vuçiqit, që nisën pas vdekjes së 16 personave në Novi Sad nga shembja e stacionit hekurudhor.

Derisa vetë Vuçiq e ka quajtur rektorin “terrorist”, në film atij i mveshen epitete të tilla si “hipokrit, tradhtar dhe agjent i huaj”.

Filmi synon të lidhë Universitetin e Nishit me “spiunët bullgarë”, duke e paraqitur profesoreshën Natalia Jovanoviq (ish-rektore e Fakultetit të Filozofisë) si “drejtuese operative e një celule spiunazhi”.

Filmi përmend edhe profesorë të tjerë që akuzohen për bashkëpunim me gjoja spiunët bullgarë.

Diplomatët bullgarë akuzohen për organizimin e një rrjeti të thellë spiunazhi dhe nënvizohet se vetë Jovanoviq “ka ngulur thikën pas shpinës së Serbisë”. Akuzave të tilla nuk iu ka shpëtuar as  konsulli aktual bullgar, Dimitar Canov.

Pas këtyre akuzave kundër Bullgarisë, portali bullgar ka paralajmëruar mobilizim të Serbisë edhe kundër misioneve diplomatike dhe shërbimeve të Kroacisë, Britanisë, Gjermanisë dhe SHBA-së, për të cilat pretendohet se bashkëpunojnë me “tradhtarë dhe agjentë vendorë”.

https://www.segabg.com/