Sot takimi i dytë Rusi-Ukrainë sipas mediave ruse, Ukraina nuk e konfirmon

Raundi i dytë i bisedimeve ndërmjet delegacioneve nga Ukraina dhe Rusia është planifikuar të mbahet të mërkurën, raportojnë mediet shtetërore ruse.

Mirëpo, zyrtarët ukrainas nuk e kanë konfirmuar ende këtë.

Mykhailo Podolyak ,këshilltari i presidentit të Ukrainës, Zelensky, ka thënë se Kievi po e shqyrton mundësinë e zhvillimit të mëtejshëm të negociatave me Rusinë.

Agjencia ruse e lajmeve TASS, të martën citoi një burim të palës ruse duke thënë se e mërkura, 2 marsi, është data për të cilën të dyja palët kishin rënë dakord për t’u takuar.

Edhe agjencia tjetër e lajmeve RIA, ka raportuar për këtë takim, i cili parashihet të mbahet në Bjellorusi, afër kufirit me Poloninë.

Agjencia e ka cituar politikanin rus Yuri Voskresensky, i cili është i informuar me zhvillimet.

Sipas tij, anëtarët e parë të të dyja delegacioneve do të mbërrijnë në kryeqytetin bjellorus, Minsk, këtë mbrëmje.

Ndryshe, raundi i parë i takimit të parë që u mbajt këtë të hënë, ka zgjatur për pesë orë dhe ka përfunduar pa ndonjë marrëveshje konkrete.

Gjatë këtyre bisedimeve, Ukraina ka kërkuar tërheqjen e të gjitha forcave ruse nga territori i saj.