Polonia paralajmëron se Wagner dëshiron të destabilizojë krahun lindor të NATO-s

Polonia ka paralajmëruar se prania në rritje e grupit mercenar rus Wagner në Bjellorusi ka për qëllim destabilizimin e krahut lindor të NATO-s në mes të luftës në Ukrainë.

Kryeministri polak Mateusz Morawiecki tha pas një takimi me presidentin lituanez Gitanas Naused më 3 gusht se aleatët e NATO-s duhet të rrisin vigjilencën e tyre pasi gjasat e provokimeve mbeten shumë të larta.

Komentet e Morawieckit erdhën dy ditë pasi dy helikopterë ushtarakë bjellorusë që kryenin stërvitje pranë kufirit shkelën për pak kohë hapësirën ajrore polake.

Ministria bjelloruse e mbrojtjes e mohoi këtë dhe akuzoi Varshavën për “fabrikime”.

“Ne duhet të jemi të vetëdijshëm se numri i provokimeve do të rritet, grupi Wagner është jashtëzakonisht i rrezikshëm dhe ata po lëvizin në krahun lindor për ta destabilizuar atë,” tha Morawiecki.

Mijëra mercenarë të Wagner-it mbërritën në Bjellorusi pas rebelimit jetëshkurtër të grupit në Rusi, dhe më 30 korrik ministria bjelloruse e mbrojtjes njoftoi se Wagner kishte filluar stërvitjen e pjesëve të ushtrisë së tyre.

Morawiecki dhe Nauseda u takuan në qytetin kufitar polak të Suwalki, i cili shtrihet në atë që tani është Korridori Suwalki – një shtrirje 80 kilometra që është e vetmja lidhje tokësore e NATO-s me anëtarët baltik, Lituaninë, Letoninë dhe Estoninë.

Në Ukrainë, disa njerëz u plagosën, njëri në gjendje të rëndë, në granatimet ruse të qytetit jugor të Khersonit, njoftuan autoritetet lokale më 3 gusht, pak pasi Rusia nisi një valë të re sulmesh me dron në Kiev për të dytën ditë me radhë./RSE/