Policia arreston një rus në Leposaviq, u kap duke u futur ilegalisht në Kosovë

Një rus është kapur duke e kaluar ilegalisht kufirin nga Serbia në Republikën e Kosovës, shkruan Gazeta Metro.

Policia ka njoftuar se dje në Zërnosek të Leposaviqit, gjatë patrullimit kanë ndaluar të dyshuarin mashkull rus i cili me automjetin e tij kishte kaluar ilegalisht kufirin nga Serbia në Republikën e Kosovës.

I njëjti është intervistuar dhe me vendim të prokurorit është arrestuar dhe dërguar në mbajtje.

Ndryshe kujtojmë që për praninë e rusëve dhe agjencive ruse është folur gjithmonë në Kosovë.

Që nga fillimi i luftës së Ukrainës, Kosova ka marrë një sërë masash ndaj shtetit rus.

Në shtator të vitit të kaluar, Qeveria e Kosovës vendosi që të gjithë shtetasit rusë, përfshirë ata me pasaporta diplomatike, të cilët duan të hyjnë, kalojnë transit apo qëndrojnë në Kosovë, duhet të pajisen me vizë.

Më herët qytetarëve rusë me pasaporta diplomatike dhe zyrtare u lejohej hyrja, transiti dhe qëndrimi deri në 15 ditë në territorin e Republikës së Kosovës, pa vizë.

Gjithashtu, liroheshin nga nevoja për tu pajisur me vizë kosovare edhe shtetasit e vendeve për të cilët Kosova aplikon regjim vizash, por të cilët kishin leje qëndrim biometrik valid të lëshuar nga njëri ndër shtetet e Zonës Shengen. /Gazeta Metro/