Petkoviq shpërndan dezinformata për masakrën e Reçakut

Kosova i ka nderuar viktimat e masakrës së Reçakut të enjten, në fshatin e Shtimes, ku 27 vjet më parë forcat serbe i vranë 45 civilë shqiptarë.

E pikërisht në ditën e përkujtimit, drejtori i ashtuquajturës Zyrë për Kosovën në Qeverinë e Serbisë, Petar Petkoviq, ka shpërndarë dezinformata duke pretenduar se “masakra e Reçakut është e fabrikuar”.

“Fabrikimi sistematik i fakteve rreth rastit të Reçakut vazhdon edhe sot me një fushatë të orkestruar nga Prishtina dhe sulmet e Albin Kurtit ndaj Beogradit, me qëllim të errësimit të së vërtetës për këtë ngjarje, si dhe për shumë krime të tjera të pandëshkuara ndaj serbëve,” tha Petkoviq.

Gjykata Ndërkombëtare për Krime Lufte në Hagë (ICTY) përmendi Reçakun në aktakuzën kundër Slobodan Millosheviqit, si pjesë e një fushate më të gjerë për vrasje civilësh në Kosovë.

Në aktakuzë thuhet se më 15 janar 1999, forcat e FRJ-së dhe Serbisë sulmuan fshatin Reçak dhe vranë rreth 45 shqiptarë të Kosovës.

Ambasada amerikane në Kosovë të enjten e përshkroi ngjarjen si një “akt tmerri të papërshkrueshëm që tronditi botën”.

Zëvendës Shefi i Misionit të Ambasadës Amerikane, Josh Peterson, u bashkua me udhëheqësit dhe qytetarët e Kosovës në përkujtimin e viktimave, duke theksuar: “Kujtesa e tyre le të shërbejë si një kujtesë për detyrën tonë të përbashkët për të mbrojtur të vërtetën dhe dinjitetin dhe si një thirrje për të mos harruar kurrë atë që bota pa”.

Një muaj më parë, Prokuroria Speciale e Kosovës ngriti aktakuzë ndaj 21 personave për krim lufte kundër popullsisë civile në Reçak.

Ata akuzohen se më 15 janar 1999, gjatë një operacioni të forcave policore serbe, vranë 42 civilë dhe ushtruan dhunë të rëndë ndaj banorëve, përfshirë shkatërrim të pronës, dëbim masiv dhe spastrim etnik.

Hetimet kanë treguar se të pandehurit kanë kontrolluar shtëpi më shtëpi, kanë ndarë burrat nga gratë dhe fëmijët, ku burrat e ndaluar janë ekzekutuar, ndërsa rreth 20,000 civilë u dëbuan nga fshatrat përreth. Gjykimi pritet të mbahet në mungesë, pasi të pandehurit janë të paarritshëm për drejtësinë.

Ish-ambasadori dhe shefi i Misionit të OSBE-së në Kosovë, William Walker, kishte parë nga afër krimin dhe luajti një rol kyç në dokumentimin e masakrës së Reçakut, duke siguruar prova që mbështesin përgjegjësinë ligjore të autorëve.

Pas masakrës së Reçakut, në mars të vitit 1999, NATO sulmoi caqet ushtarake policore në ish-Jugosllavi.

Fusha prej 78-ditësh bombardime mori fund më 10 qershor 1999, pas miratimit të Rezolutës 1244 të Këshillit të Sigurimit të Kombeve të Bashkuara.

Ndërhyrja e NATO-s në Kosovë kishte mundësuar edhe kthimin në shtëpitë e tyre të më shumë se 800.000 refugjatëve, personave të zhvendosur brenda dhe jashtë Kosovës.

Në luftën e zhvilluar në Kosovë më 1998-‘99, u vranë mbi 13.000 civilë dhe mijëra të tjerë u zhdukën.

Mbi 1.500 persona vazhdojnë të jenë ende të pagjetur – pjesa më e madhe e tyre shqiptarë.

The GeoPost