Petkoviq i ankohet ambasadorit rus, pretendon se Kosova po e “mbyt” dialogun

Drejtori i “Zyrës për Kosovën” në Qeverinë serbe, Petar Petkoviq, e ka lidhur arrestimin e Igor Popoviqit me dialogun, duke pretenduar se kësisoj Kosova po e “mbyt” atë.

Kështu deklaroi ai pas një bisede që pati me ambasadorin e Rusisë në Beograd, Aleksandar Bocan-Harchenko, të cilit i është ankuar se “janë të shqetësuar” pas arrestimit të Popoviq nga autoritet e Kosovës.

Më 18 korrik, Popoviq derisa ishte në Hoqë të Madhe, e quajti Ushtrinë Çlirimtare të Kosovës (UÇK) “organizatë terroriste”, ndërkohë që ndodhej atje për të marrë pjesë në përvjetorin e vrasjes së serbëve në territorin e komunës së Rahovecit.

Arrestimin e tij, Petkoviq e ka quajtuar “hakmarrje politike”, ndërsa ka shtuar se paraburgimi i tij “nuk bazohet në sundim të ligjit”.

“Prishtina vazhdon me veprime përshkallëzuese, me ngritjen e tensioneve dhe shkaktimin e krizave në terren dhe me veprimet e saj, përfshirë edhe arrestimin e ndihmësit tim Igor Popoviq, po e zhvlerëson dhe po e mbyt drejtpërdrejt dialogun”, ka thënë Petkoviq.

Lidhur me arrestimin e ndihmësit të Petkoviq, Igor Popoviqit, ka reaguar edhe ministri i Jashtëm i Serbisë, Marko Gjuriq, i cili e ka kërcënuar se “Serbia do të marrë masat hakmarrëse”.

Kujtojmë se ministri në detyrë i Punëve të Brendshme të Kosovës, Xhelal Sveçla, ka deklaruar se Kosova nuk do të tolerojë fyerje dhe përdhosje të historisë dhe të luftës së udhëhequr nga UÇK-ja./The Geopost/