“Për një serb do të vrasim 100 myslimanë”, Stojkoviq i reagon Vuçiqit: Ti je ai që nxite gjenocidin, do duhej të ishe në Hagë me Mlladiqin

Vuçiq tha se Tribunali i Hagës kishte dashur që Mlladiqi “të vdiste pas hekurave” dhe se nuk ishte lejuar që gjenerali të vdiste në Serbi, aty ku, sipas tij, kishte dëshiruar.

Stojkoviq i është përgjigjur me tone të ashpra.

“President i neveritshëm. Quhet BURGIM I PËRJETSHËM për një arsye. Dënimi me burgim të përjetshëm pikërisht do të thotë – vdes në burg. Jo në shtëpi. Jo në bregdet. Jo në SPA”, ka shkruar Stojkoviq.

Ai ka theksuar se dënimi i Mlladiqit me burgim të përjetshëm erdhi për shkak të krimeve për të cilat ai u shpall fajtor nga drejtësia ndërkombëtare.

Më pas, Stojkoviq i është drejtuar drejtpërdrejt Vuçiqit, duke e akuzuar për nxitje të gjenocidit dhe duke iu referuar një deklarate të bërë prej tij gjatë luftës në Bosnje.

“Ti, duke e ditur planin për Srebrenicën, vetëm nëntë ditë para hyrjes së Mlladiqit në Srebrenicë, ke thënë publikisht: ‘Për një serb do të vrasim 100 myslimanë’”, ka shkruar ai.

Stojkoviq e ka lidhur këtë deklaratë me masakrën e Srebrenicës, ku në korrik të vitit 1995 u vranë më shumë se 8 mijë burra dhe djem boshnjakë.

“Ti duhej të ishe në Hagë në të njëjtën kohë me Mlladiqin”, ka deklaruar ai.

Në reagimin e tij, avokati serb e ka krahasuar politikën e ekzekutimeve masive gjatë luftës në Bosnje me praktikat e Gjermanisë naziste në Serbinë e pushtuar gjatë Luftës së Dytë Botërore.

Stojkoviq ka kritikuar gjithashtu Vuçiqin për qëndrimin e tij ndaj figurës së Ratko Mlladiqit dhe e ka akuzuar për promovimin e emrit të tij në hapësirën publike në Serbi.

Në fund, ai i është rikthyer deklaratës së Vuçiqit për Hagën.

“Dhe nëse diçka është veprim anticivilizues – është fakti që ti, pavarësisht gjithë kësaj, je ende i lirë”, ka shkruar Stojkoviq.