Me thirrjen dhe këngë ultranacionaliste, grupet djathtiste serbe protestojnë në mbështetje të barrikadave në veri të Kosovës

Me këngë dhe thirrje ultranacionaliste grupe djathtiste serbe kanë protestuar në afërsi të pikës kufitare të Jarinjës, që gjendet në pjesën e Serbisë.

Këtë protestë këto grupe e kanë bërë për t’i dhënë mbështetje barrikadave që janë vendosur nga serbët në veri të Kosovës, e që po mbështeten nga regjimi i Aleksandar Vuciqit, shkruan The Geopost.

Policia serbe e ka krijuar një kordon në afërsi të kufirit me Kosovën.

Thirrja për protestë është bërë nga grupet djathtiste, siç është “Patrulla Kombëtare”, si dhe është bërë thirrje që organizimit t’i bashkohen mbështetës tjerë nga Serbia, Mali i Zi dhe Republika Srpska e Bosnjë e Hercegovinës.

Në mesin e tyre është edhe Damjan Knezheviq, kreu i grupit jozyrtar të ekstremit të djathtë “Patrulla Kombëtare” nga Serbia.

“Patrulla Kombëtare” njihet për veprimet e saj kundër emigrantëve, për glorifikimin e kriminelëve serbë të luftës dhe mbështetjen për Rusinë në luftën që zhvillon në Ukrainë.

Organizata është e lidhur me grupin e ekstremit të djathtë “Rusov” dhe grupin paraushtarak rus Wagner, të cilin e ka vizituar së fundi në Rusi.

Në disa pamje të publikuara në platformat online, protestuesit dëgjohen duke insistuar që t’i afrohen pikës kufitare, ku shihen trupa të misionit të NATO-s, KFOR.

Disa nga rrugët në veri të Kosovës, vazhdojnë të jenë të bllokuara për të nëntën ditë më radhë, si pasojë e vendosjes së barrikadave nga serbët lokalë të mbështetura nga Beogradi. /The Geopost/