Ministria e Mbrojtjes ka përfunduar procedurat për blerjen e pajisjeve anti-tank nga Gjermania për Forcën e Sigurisë së Kosovës (FSK).
Lajmi është konfirmuar për The GeoPost nga Ministria e Mbrojtjes e Kosovës.
Armët PANZERFAUST 3 pritet t’i dorëzohen së shpejti FSK-së, duke rritur ndjeshëm kapacitetet e saj mbrojtëse kundër mjeteve të blinduara.
Paralelisht, Kosova ka nënshkruar edhe një marrëveshje me prodhuesin amerikan të industrisë ushtarake AM General për blerjen e sistemeve moderne të artilerisë së lëvizshme HUMVEE Hawkeye 105 mm.
Përveç sistemeve të artilerisë Hawkeye, kontrata trivjeçare parasheh edhe furnizimin e FSK-së me ambulanca, kamionë për komandim dhe kontroll, si dhe mjete të tjera mbështetëse, të nevojshme për funksionimin e një baterie të plotë artilerie dhe zhvillimin e kapaciteteve të qitjes indirekte.
Nga AM General, zëvendëspresidenti ekzekutiv për Zhvillim Biznesi, John Chadbourne, deklaroi se shitja e sistemit HUMVEE Hawkeye për Kosovën është dëshmi e përkushtimit të kompanisë për të ofruar zgjidhje të avancuara për nevojat moderne ushtarake.

Sistemi HUMVEE Hawkeye është i pajisur me teknologjinë Soft Recoil, e cila lejon integrimin e topit 105 mm mbi platformën HUMVEE, duke mundësuar vendosjen, qitjen dhe zhvendosjen e shpejtë të sistemit në më pak se 90 sekonda, çka rrit ndjeshëm mbijetesën ndaj zjarrit kundërbaterik.
Vitet e fundit, Kosova ka përshpejtuar procesin e armatosjes, kryesisht përmes blerjeve nga Shtetet e Bashkuara dhe Turqia, përfshirë raketa dhe dronë.
Nuk është hera e parë që Kosova bashkëpunon me AM General, pasi në vitin 2018 vendi pranoi 51 automjete ushtarake amerikane të tipit Humvee.
Kosova ndodhet në procesin dhjetëvjeçar të shndërrimit të FSK-së në ushtri, i cili ka nisur më 2018. Ky proces është mbështetur nga Shtetet e Bashkuara, ndërsa NATO vazhdon të insistojë që FSK-ja të fokusohet në mandatin e saj fillestar, si reagimi ndaj krizave dhe mbrojtja civile.
Ndërkohë, Qeveria e Kosovës ka rritur vazhdimisht buxhetin e mbrojtjes.
Për vitin aktual, buxheti për këtë sektor arrin në 207.8 milionë euro, duke reflektuar prioritetin strategjik që i jepet sigurisë dhe mbrojtjes kombëtare./TheGeoPost.

Bosnja dhe Hercegovina i ndalon hyrjen Milan Radoiçiqit: Shpallet kërcënim për sigurinë kombëtare për shkak të sulmit terrorist në Banjskë
Raporti i Gallupit për 2025-ën: Kosova, ndër vendet më të sigurta në Evropë
Stojkoviq reagon ndaj drejtësisë serbe për Radoiçiqin: E lanë të lirë terroristin, gjyqtarët dhe prokurorët shkelën ligjin për ta mbrojtur atë
Partia Popullore Evropiane do të propozojë pezullimin e partisë së Vuçiqit
Kënga nacionaliste serbe në Bruksel, eurodeputeti belg ia kujton Marta Kos-it krimet e Millosheviqit në Kosovë
“Serbia nuk i sanksionon rusët dhe vazhdon linjën nacionaliste ndaj Kosovës”, Martens kërkon distancim nga Beogradi