Bashkimi Evropian kërkon t’i japë fund varësisë nga Kina për metalet e rralla

Përmes planit RESourceEU, Bashkimi Evropian kërkon t’i japë fund varësisë nga Kina për lëndët e para kritike, të cilat janë thelbësore për sektorët e automobilave, mbrojtjes, teknologjisë së gjelbër dhe dixhitalit të Evropës.

 Komisionerja Evropiane Ursula von der Leyen tha të shtunën se Bashkimi Evropian po punon për një strategji për të zvogëluar varësinë e tij nga lëndët e para kritike kineze.

Strategjia e rinovuar vjen në përgjigje të vendimit të Kinës në tetor për të zbatuar kufizime më të rrepta mbi eksportet e metaleve të rralla. Gjigandi aziatik ka të ngjarë ta ketë bërë këtë në përgjigje të tarifave tregtare të vendosura nga Presidenti i SHBA-së Donald Trump, por von der Leyen theksoi ndikimin që do të kishte në Evropë.

“Nëse merrni parasysh se mbi 90% e konsumit tonë të magneteve të metaleve të rralla vjen nga importet nga Kina, shihni rreziqet këtu për Evropën dhe sektorët e saj më strategjikë industrialë”, tha von der Leyen në një konferencë në Berlin.

Këto minerale janë thelbësore për industritë e BE-së, siç janë sektori i automobilave, mbrojtjes, teknologjisë së gjelbër dhe dixhitalit.

Von der Leyen tha se në afat të shkurtër, BE-ja do të përqendrohet në gjetjen e zgjidhjeve me homologët e saj kinezë, por gjithashtu do të shtojë përpjekjet e saj për t’u koordinuar me vendet e tjera për të siguruar akses në burime alternative të mineraleve.

“Qëllimi është të sigurohet akses në burime alternative të lëndëve të para kritike në afat të shkurtër, të mesëm dhe të gjatë për industritë tona evropiane”, tha von der Leyen. “Ne do të përshpejtojmë punën për partneritetet e lëndëve të para kritike me vende si Ukraina dhe Australia, Kanadaja, Kazakistani, Uzbekistani, Kili dhe Groenlanda”.

Shefja e Komisionit Evropian tha se skema e re, e quajtur RESourceEU, merr përsipër REPowerEU, një iniciativë e nisur pas pushtimit të Ukrainës nga Rusia me qëllim forcimin e pavarësisë së BE-së në sektorin e energjisë, larg burimeve ruse të energjisë.

“Fillon me një ekonomi rrethore, jo për arsye mjedisore, por për të shfrytëzuar lëndët e para kritike që tashmë gjenden në produktet e shitura në Evropë”, tha von der Leyen.

“Përveç kësaj, ne do të përqendrohemi në gjithçka, nga blerjet e përbashkëta deri te grumbullimi i stoqeve. Ne do të rrisim investimet dhe projektet strategjike për prodhimin dhe përpunimin e lëndëve të para kritike këtu në Bashkimin Evropian”, shtoi ajo.

/www.euronews.com