Ballkani në rrezik, Stoltenberg: Ka potencial për tensione në Kosovë e Bosnjë

Shefi i NATO-s i bëri këto komente pas takimit që pati të premten me kryeministrin malazez Milojko Spajiç në Bruksel, nga ku dënoi shpërthimin e dhunës në Kosovë vitin e kaluar duke thënë se NATO reagoi me shpejtësi duke dërguar një mijë trupa shtesë për të ndihmuar KFOR-in që të zbatojë mandatin e tij, raporton The Geopost.

“Shpërthimet e dhunës vitin e kaluar në Kosovë ishin të papranueshme. NATO u përgjigj me shpejtësi, duke dërguar 1,000 trupa shtesë dhe mjete të blinduara. Jemi të përkushtuar të sigurohemi që KFOR-i vazhdon ta përmbushë mandatin e vet sipas OKB-së”, tha Stoltenberg.

Kryeministri i Malit të Zi, Spajiç, vendi i të cilit është anëtarësuar në NATO para shtatë vjetësh, tha se Podgorica e kupton se prania e NATO-s në rajon sjell siguri dhe stabilitet.

“Mali i Zi e kupton se shumë zhvillime globale kërkojnë vigjilencë të vazhdueshme që tërheq, me të drejtë, vëmendjen e aleatëve. Por ne nuk duhet të harrojmë rajonin. Nënvizoj edhe njëherë rëndësinë e vazhdimit të pranisë së NATO-s në rajon, sepse kjo është një garanci e fortë e paqes dhe stabilitetit. Unë pres që kjo të rikonfirmohet në takimit e nivelit të lartë të ardhshëm të NATO-s në Uashington”, tha Spajiç.

Përgjatë vitit 2023 ka pasur disa herë shpërthime të dhunës në Kosovë. Me 24 shtator, Kosova u gdhi me lajmin se një pjesëtar i policisë mbeti i vrarë nga një sulm terrorist që u organizua dhe financua nga Serbia dhe të paktën dy të tjerë u plagosën gjatë përleshjeve me grupin e udhëhequr nga Milan Radojiçiq, që atëherë ishte nënkryetar i Listës Serbe, partisë kryesore të serbëve në Kosovë që mbështetet nga pushteti i Aleksandar Vuçiqit.

Të vrarë mbetën edhe disa pjesëtarë të grupit, gjatë përleshjeve që zgjatën pothuajse tërë ditën, duke ngritur shqetësimin për qëndrueshmërinë në rajonin e brishtë.

Në muajin maj, të paktën 25 persona u lënduan gjatë përleshjeve të protestuesve serbë në Zveçan, në pjesën veriore të Kosovës, me ushtarët e KFOR-it. Ministri i jashtëm italian, Antonio Tajani tha se u lënduan 11 pjesëtarë italianë të KFOR-it, 3 prej të ishin në gjendje të rëndë.

Situata e tensionuar në Kosovë u zhvillua pasi kryetarët shqiptarë morën detyrën në komunat e pjesës veriore ku shumica e banorëve janë serbë pas zgjedhjeve lokale që serbët i bojkotuan.

Pas kësaj, Vuçiq vendosi ushtrinë në gatishmëri të plotë luftarake dhe urdhëroi njësitë ushtarake të afrohen më pranë kufirit me Kosovën.

Analistët thonë se lufta në Ukrainë i ka shtuar aktivitet e Moskës për të ripërtërirë ndikimin në Ballkan të cilin mundohet ta shfrytëzojë për të tërhequr vëmendjen nga agresioni i saj në Ukrainë.

Shefi i NATO-s foli edhe për anëtarësimin e Suedisë në NATO, një proces që po zgjat për një vit e gjysmë, duke thënë se kjo do të forconte aleancën ushtarake ndërsa vazhdon agresioni rus në Ukrainë.

Ai e përshëndeti vendimin e Turqisë për të miratuar kërkesën e Suedisë, ndërsa tha se pret që Hungaria ta bëjë këtë në fund të muajit të ardhshëm.

“Unë jam absolutisht i sigurt dhe kam besim tek Hungaria se miratimi i anëtarësimit të Suedisë do të bëhet sapo të mblidhet parlamenti në fund të shkurtit”, tha shefi i NATO-s, Stoltenberg.

Suedia, së bashku me Finlandën, braktisën pozicionet e tyre tradicionale të mosangazhimit për të kërkuar mbrojtje nën ombrellën e NATO-s, pas agresionit rus në Ukrainë në shkurt të vitit 2022./The Geopost/