“Vazhdoni të ëndërroni”, Rutte: Evropa nuk mund të mbrohet pa SHBA-në, Ukraina duhet të mbështetet plotësisht

Sekretari i Përgjithshëm i NATO-s, Mark Rutte, ka paralajmëruar se Ukraina po përballet me “dimrin më të ashpër” në më shumë se një dekadë, si pasojë e intensifikimit të sulmeve ruse ndaj infrastrukturës kritike, veçanërisht në Kiev dhe në qytete të tjera të mëdha.

Duke folur para Parlamentit Evropian, Rutte tha se bisedimet e paqes të udhëhequra nga Shtetet e Bashkuara janë në zhvillim e sipër, duke vlerësuar iniciativën amerikane dhe rolin e “Koalicionit të të Vullnetshmëve” evropian, i cili po punon për ofrimin e garancive të sigurisë për Ukrainën.

Sipas tij, objektivi duhet të jetë ose arritja e një marrëveshjeje paqeje, ose një armëpushim afatgjatë, me qëllim që të parandalohet një sulm i ri nga presidenti rus Vladimir Putin. Ai theksoi se siguria e Ukrainës është e lidhur drejtpërdrejt me sigurinë e Evropës në tërësi.

Rutte u bëri thirrje eurodeputetëve që të mos vendosin kufizime të tepërta në përdorimin e rreth 90 miliardë eurove kredi evropiane për sigurinë, duke paralajmëruar se kushtet e ashtuquajtura “blerje evropiane” mund të kufizojnë aftësinë e Ukrainës për të siguruar pajisjet që i nevojiten ose për të përdorur në mënyrë efektive fondet. Ai theksoi se prioritet duhet të mbeten nevojat e Ukrainës.

Duke folur për zhvillimet në Arktik dhe Groenlandë, Rutte tha se ka zhvilluar biseda me udhëheqës evropianë, nga të cilat kanë dalë dy drejtime kryesore: forcimi i aktiviteteve kolektive të NATO-s në Arktik përballë kërcënimeve nga Rusia dhe Kina, si dhe menaxhimi i marrëdhënieve mes Danimarkës, Groenlandës dhe Shteteve të Bashkuara pas takimeve të fundit me zyrtarë të lartë amerikanë.

Ai sqaroi se nuk ka mandat për të negociuar në emër të Danimarkës, por mbrojti presidentin amerikan duke thënë se ka të drejtë të ngrejë shqetësime mbi sigurinë në Arktik.

Sa i përket Ukrainës, Rutte iu referua deklaratave të presidentit Volodymyr Zelensky, sipas të cilave garancitë e sigurisë nga SHBA janë afër një marrëveshjeje. Megjithatë, ai pranoi se çështja e territoreve mbetet veçanërisht e ndjeshme dhe theksoi se vetëm Ukraina mund të vendosë për kompromiset e mundshme.

Rutte tha gjithashtu se Ukraina dëshiron anëtarësimin në NATO, por vuri në dukje se kundërshtimet e disa vendeve anëtare e bëjnë këtë perspektivë politikisht jorealiste për momentin. Ai mohoi kategorikisht se SHBA ka tentuar të lidhë garancitë e sigurisë për Ukrainën me diskutimet për Groenlandën.

Sekretari i Përgjithshëm përshëndeti veprimin e Francës për sekuestrimin e një tankeri që dyshohet se i përket të ashtuquajturës “flotë në hije”, duke theksuar se masa të tilla godasin burimet e financimit të Rusisë për luftën në Ukrainë.

Duke komentuar idetë për një alternativë evropiane ndaj NATO-s pa SHBA-në, Rutte paralajmëroi se një skenar i tillë do të ishte jashtëzakonisht i ndërlikuar dhe, sipas tij, do t’i shërbente interesave të Moskës. Ai shtoi se rritja e shpenzimeve të mbrojtjes në 2 për qind të PBB-së nga vendet anëtare të NATO-s nuk do të ishte arritur pa presionin e ushtruar nga presidenti amerikan Donald Trump.

Në fund, Rutte theksoi se Evropa ka nevojë për Shtetet e Bashkuara, ashtu si SHBA-ja ka nevojë për NATO-n, duke siguruar se prania ushtarake amerikane në Evropë do të mbetet e fortë, pavarësisht ndryshimeve në prioritetet e Uashingtonit.

The Geo Post