Shefi i CIA-s: Kina dyshon në aftësinë për të pushtuar Tajvanin

Inteligjenca amerikane tregon se presidenti i Kinës Xi Jinping ka urdhëruar ushtrinë e vendit të tij që të jetë gati për të pushtuar Tajvanin deri në vitin 2027, megjithëse ai mund të ketë dyshime për aftësinë e tij, duke pasur parasysh përvojën e Rusisë në luftën me Ukrainën, tha drejtori i CIA-s, William Burns.

Në një intervistë televizive që u transmetua të dielën, Burns theksoi se Shtetet e Bashkuara duhet ta marrin dëshirën e Xi për të kontrolluar Tajvanin “shumë seriozisht”, edhe nëse konflikti ushtarak nuk është i pashmangshëm.

“Ne e dimë siç është bërë publike se presidenti Xi ka udhëzuar PLA, udhëheqjen ushtarake kineze, që të jetë gati për të pushtuar Tajvanin deri në vitin 2027, por kjo nuk do të thotë se ai ka vendosur të pushtojë në 2027 ose ndonjë vit tjetër,” tha Burns në emisionin CBS “Face the Nation”.

“Unë mendoj se sot presidenti Xi dhe udhëheqja e tij ushtarake kanë dyshime për aftësinë e tyre për të kryer këtë pushtim,” tha ai.

Tajvani dhe Kina u ndanë në vitin 1949 pas një lufte civile që përfundoi me marrjen e kontrollit të kontinentit nga Partia Komuniste. Ishulli vetëqeverisës sillet si një shtet sovran, por nuk njihet nga Kombet e Bashkuara apo ndonjë vend i madh. Në vitin 1979, Presidenti Jimmy Carter njohu zyrtarisht qeverinë në Pekin dhe ndërpreu lidhjet me Tajvanin. Si rezultat, Kongresi miratoi Aktin e Marrëdhënieve me Tajvanin, duke hedhur themelet për një marrëdhënie të vazhdueshme.

Përballë demonstratave në rritje të pushtetit nga Pekini, i cili pretendon Tajvanin si pjesë të territorit të tij, Tajvanit i është siguruar vazhdimisht mbështetje zyrtare amerikane për demokracinë ishullore. Presidenti Joe Biden ka deklaruar se forcat amerikane do të mbrojnë Tajvanin nëse Kina tenton të pushtojë. Shtëpia e Bardhë deklaron se politika amerikane nuk ka ndryshuar dhe se Uashingtoni dëshiron një zgjidhje paqësore për statusin e Tajvanit. Nuk thuhet nëse forcat amerikane mund të dërgohen në përgjigje të një sulmi kinez.

Në intervistën e së dielës, Burns tha se mbështetja nga aleatët amerikanë dhe evropianë për Ukrainën pas pushtimit të atij vendi nga presidenti rus Vladimir Putin, mund të jetë duke vepruar si një frenues i mundshëm për zyrtarët kinezë tani për tani, por tha se rreziqet e një sulmi të mundshëm ndaj Tajvanit vetëm sa do të bëhen më të forta.

“Unë mendoj, pasi ata kanë parë përvojën e Putinit në Ukrainë, kjo ndoshta ka përforcuar disa nga këto dyshime,” tha Bërns. “Pra, e gjitha që do të thosha është se unë mendoj se rreziqet e, ju e dini, të një përdorimi potencial të forcës ndoshta rriten më tej në këtë dekadë që ju merrni dhe përtej saj, në dekadën pasuese gjithashtu.

“Kështu që kjo është diçka e qartë, që ne e shohim me shumë, shumë kujdes,” tha ai.