Rusia përdor inteligjencën artificiale për të manipuluar narrativat mbi mobilizimin në Ukrainë

Qendra Kundër Dezinformimit, ka identifikuar një operacion të ri informativ të Rusisë që përdor video të gjeneruara nga inteligjenca artificiale, me synim manipulimin e opinionit publik dhe polarizimin e shoqërisë ukrainase rreth çështjes së shërbimit ushtarak dhe mobilizimit.

Sipas Qendrës, në rrjetet sociale po qarkullojnë video që paraqesin gra të krijuara artificialisht, të cilat pretendojnë se kërkojnë marrëdhënie ekskluzivisht me ushtarakë për të përfituar kompensime të larta shtetërore në rast të vdekjes së tyre.

Në këto përmbajtje, “gratë” rrëfejnë histori të fabrikuara, duke pohuar se gjatë luftës në shkallë të plotë janë martuar disa herë, se bashkëshortët e tyre janë vrarë dhe se çdo herë kanë përfituar pagesa kompensimi.

Autoritetet theksojnë se këto narrativa nuk pasqyrojnë realitetin në Ukrainë. Përkundrazi, fenomeni i ashtuquajtur i “vejushave të zeza” është i dokumentuar në Rusi, ku tema diskutohet gjerësisht në media dhe ku zyrtarët po kërkojnë zgjidhje legjislative për ta adresuar. Sipas vlerësimeve, propagandistët rusë po përpiqen ta zhvendosin këtë problem të brendshëm rus në kontekstin ukrainas përmes dezinformimit.

Qëllimi i operacionit informativ, sipas Qendrës, është të thellojë përçarjet shoqërore, të nxisë mosbesim mes ushtrisë dhe civilëve dhe të demotivojë qytetarët që të mos i bashkohen shërbimit ushtarak.

Ekspertët paralajmërojnë se përdorimi i inteligjencës artificiale në fushata të tilla dezinformuese përbën një kërcënim serioz për sigurinë informative dhe kërkon reagim të koordinuar për identifikimin dhe kundërshtimin e narrativave të rreme.

⚡️ The Center is recording a new russian information operation using AI-generated videos, aimed at polarizing Ukrainian society around the issue of military service and mobilization.

Thread ⬇️ pic.twitter.com/CDgt5ZdNL7

— Center for Countering Disinformation (@CforCD) January 6, 2026