Polonia deporton 11 persona të dyshuar për veprimtari në favor të Rusisë dhe Bjellorusisë

Polonia ka deportuar 11 persona të dyshuar për veprimtari në interes të Rusisë dhe Bjellorusisë, në kuadër të një operacioni të shërbimeve të sigurisë që lidhet me dyshime për ndikim të organizuar ndaj refugjatëve ukrainas në territorin polak.

Sipas Agjencisë së Sigurisë së Brendshme të Polonisë (ABW), në mesin e të dëbuarve janë nëntë shtetas ukrainas dhe dy bjellorusë. Autoritetet polake dyshojnë se grupi ka përdorur fonde ruse për të rekrutuar refugjatë ukrainas, me qëllim organizimin e protestave kundër qeverisë në Kiev.

ABW bëri të ditur se aktiviteti i grupit ishte i orientuar drejt ndikimit gradual në komunitetin e refugjatëve ukrainas në Poloni, duke e përdorur atë për promovimin e sloganeve politike dhe nxitjen e pakënaqësisë.

Sipas agjencisë, organizatorët dyshohet se kanë shfrytëzuar edhe skandale të korrupsionit dhe zhvillime të tjera politike në Ukrainë për të nxitur tensione dhe për të rritur pakënaqësinë mes refugjatëve.

“Ky është një shembull i operacioneve që shkojnë përtej agresionit klasik ushtarak, me synim minimin e besimit publik, nxitjen e tensioneve dhe shfrytëzimin e njerëzve që kanë ikur nga lufta si instrumente të ndikimit rus”, thuhet në deklaratën e ABW-së.

Autoritetet polake pretendojnë se të dyshuarit kanë pasur lidhje me Rusinë dhe Bjellorusinë dhe se aktivitetet e tyre kanë nisur që nga vjeshta e vitit 2025.

Polonia prej kohësh akuzon Rusinë dhe Bjellorusinë për zhvillimin e një fushate hibride kundër saj, që përfshin sabotime, sulme kibernetike dhe operacione dezinformuese pas nisjes së pushtimit të Ukrainës në vitin 2022. Moska i ka mohuar vazhdimisht këto akuza.