Ndryshim historik në Hungari, opozita në epërsi ndaj pro-rusit, Viktor Orban

Dy sondazhe të fundit të opinionit publik në Hungari sugjerojnë një fitore të thellë të partisë opozitare Tisza, duke rritur mundësinë për largimin nga pushteti të kryeministrit Viktor Orbán pas 16 vitesh në detyrë.

Sipas raportimit të BBC, sondazhi i realizuar nga Median e vendos partinë e udhëhequr nga Péter Magyar në 57.1 për qind të votave, rezultat që do t’i siguronte rreth 135 ulëse në parlament – mjaftueshëm për një shumicë prej dy të tretash.

Një tjetër sondazh, i publikuar nga Qendra Kërkimore 21, i jep opozitës 55 për qind të votave dhe rreth 132 ulëse, shumë pranë pragut të nevojshëm për kontroll të plotë parlamentar.

Në të njëjtën kohë, të dy sondazhet tregojnë rënie të ndjeshme për partinë në pushtet Fidesz, me Median që e rendit atë në 37.1 për qind të votave, ndërsa Qendra Kërkimore 21 në rreth 38 për qind.

Megjithatë, ekspertët theksojnë se këto mbeten sondazhe të opinionit dhe jo rezultate zyrtare apo sondazhe daljeje. Sondazhi i Median është realizuar në periudhën 7–11 prill, ndërsa ai i Qendrës Kërkimore 21 midis 8–11 prillit.

Nëse këto projeksione konfirmohen në rezultatet përfundimtare, Hungaria mund të përballet me një ndryshim të madh politik, duke i dhënë fund një epoke të gjatë të qeverisjes së Orbánit dhe duke hapur rrugën për një drejtim të ri politik nën udhëheqjen e opozitës.

The GeoPost