“Më i zgjuar, më i avancuar, më modern” – si lufta e dronëve po përcakton konfliktin në Ukrainë

Dronët nuk janë më vetëm një mjet ndihmës në luftën në Ukraina – ata janë shndërruar në një faktor kyç që po përcakton mënyrën se si zhvillohet konflikti.

Nga një zgjidhje e improvizuar në fillim të luftës, përdorimi i tyre është kthyer në një garë të avancuar teknologjike mes palëve ndërluftuese.

Forcat ukrainase, të shtyra nga nevoja dhe inovacioni, kanë arritur jo vetëm të mbajnë vijën e frontit, por edhe të kryejnë sulme të thella në territorin e kontrolluar nga Rusia. Objektivat përfshijnë infrastrukturë ushtarake, depo municionesh, qendra prodhimi të dronëve dhe rafineri nafte, duke zgjeruar ndjeshëm hapësirën e konfliktit.

Në zemër të këtij evolucioni janë njësi të specializuara si “Typhoon”, pjesë e Gardës Kombëtare të Ukrainës, e krijuar në vitin 2024. Kjo njësi operon në zona kyçe si Kharkiv dhe Pokrovsk, duke u fokusuar ekskluzivisht në luftën me dronë dhe sistemet elektronike.

Aktiviteti i saj përfshin një gamë të gjerë operacionesh – nga zbulimi dhe përdorimi i UAV-ve sulmuese deri te lufta elektronike, përgjimi i komunikimeve dhe mbrojtja nga ndërhyrjet e armikut.

E përbërë kryesisht nga vullnetarë dhe veteranë të forcave speciale, njësia kombinon përvojën në terren me njohuri të avancuara teknologjike, duke iu përshtatur një lufte që po ndryshon me ritme të shpejta.

Një nga figurat kyçe të njësisë është “Yuri”, një nënkolonel me origjinë nga Krimea. Para fillimit të pushtimit të plotë rus në vitin 2022, ai drejtonte një kompani ndërtimi.

Me shpërthimin e luftës, ai u bashkua si vullnetar dhe mori pjesë në beteja të rëndësishme, përfshirë ato në Irpin, Kharkiv dhe rajonin e Donetskut.

Sot, ai shërben si komandant grupi në njësinë Typhoon, duke u fokusuar në mbështetjen e luftës elektronike dhe koordinimin e operacioneve.

Në një intervistë për Kyiv Post, Yuri shpjegon se roli i njësisë së tij është të mbrojë forcat ukrainase nga dronët armikë dhe njëkohësisht të mbledhë inteligjencë për pozicionet e kundërshtarit.

“Ne skanojmë territorin e armikut, hartëzojmë sinjalet radio, kapim dhe deshifrojmë komunikimet dhe ua kalojmë këtë informacion njësive tona,” shpjegon ai.

Sipas tij, lufta moderne zhvillohet në mënyrë intensive në spektrin e radios. Njësitë janë vazhdimisht në kërkim të frekuencave të paprekura nga bllokimi, ndërsa pala tjetër përpiqet t’i identifikojë dhe t’i neutralizojë ato.

“Është një lojë e vazhdueshme. Sapo armiku bllokon një frekuencë, ne kalojmë në një tjetër,” thotë ai.

Një nga sfidat kryesore mbetet ndërhyrja elektronike ruse, e cila shpesh e bën të pasigurt përdorimin e GPS-it. Për këtë arsye, operacionet mbështeten kryesisht në frekuencat radio dhe në përdorimin e përsëritësve, përfshirë edhe ata ajrorë, që ndihmojnë në zgjerimin e rrezes së veprimit.

Njësitë ukrainase krijojnë gjithashtu harta të detajuara të zonave të bllokimit, duke analizuar efektivitetin e ndërhyrjeve të armikut. Kjo u mundëson ekipeve të planifikojnë rrugët e tyre, duke shmangur zonat me ndërhyrje të forta, të njohura si “re bllokuese”.

Në këtë mënyrë, lufta në Ukrainë po shndërrohet gjithnjë e më shumë në një përballje teknologjike, ku dominimi në ajër dhe në spektrin elektronik po bëhet po aq vendimtar sa edhe kontrolli i territorit në tokë.

The Geopost