Mbretëria e Bashkuar i premton Ukrainës drone dhe raketa gjatë turneut evropian të Zelensky

Kryeministri britanik Rishi Sunak tha të hënën se do të dërgonte drone dhe qindra raketa të tjera në Ukrainë gjatë vizitës së presidentit ukrainas Volodymyr Zelensky në Britani, si pjesë e një turneu evropian që synon të fitojë mbështetje për një kundërofensivë kundër forcave ruse.

Në prag të takimit, në rezidencën Chekers, Sunak përqafoi Zelenskyn, i cili bëri vizitën e tij të dytë në Britani që nga fillimi i pushtimit rus në shkurt 2022.

Zelensky falënderoi Mbretërinë e Bashkuar për mbështetjen e deritanishme dhe tha se lufta ishte një çështje e “sigurisë jo vetëm të Ukrainës, por të gjithë Evropës”. Sunak i tha Zelenskyt se “udhëheqja e tij, guximi dhe këmbëngulja e vendit të tij janë një frymëzim për të gjithë”.

Mbretëria e Bashkuar është vendi i pestë evropian i vizituar nga Zelensky në tre ditët e fundit, pas Italisë, Vatikanit, Gjermanisë dhe Francës. Kremlini ka sinjalizuar se e sheh premtimin e Londrës për të dërguar armë shtesë në Kiev “shumë negativisht”, por nuk beson se furnizimet do të ndryshojnë në mënyrë drastike situatën në fushën e betejës.

Më herët, zyra e Rishi Sunak tha se udhëheqësi britanik do të konfirmojë të hënën dorëzimin e qindra raketave të mbrojtjes ajrore dhe sistemeve ajrore pa pilot, duke përfshirë qindra dronë të rinj me një distancë prej më shumë se 200 kilometra.

“Sot – Londër. Mbretëria e Bashkuar është një lider kur bëhet fjalë për zgjerimin e aftësive tona në tokë dhe në ajër”, tha Zelensky në Twitter.

“Ky është një moment vendimtar në rezistencën e Ukrainës kundër një lufte të tmerrshme,” tha Sunak në një deklaratë. Ata kanë nevojë për mbështetjen e vazhdueshme të komunitetit ndërkombëtar për t’u mbrojtur kundër ortekëve të sulmeve të pamëshirshme dhe pa dallim, që kanë qenë rutina e tyre e përditshme për më shumë se një vit.”

Pas SHBA-së, Britania e Madhe është një nga donatorët më të mëdhenj të ndihmës ushtarake për Ukrainën – duke dhënë 2.9 miliardë dollarë vitin e kaluar dhe duke u zotuar pothuajse po aq në vitin 2023.

Në janar, Britania njoftoi se do të dërgonte 14 nga tanket e saj kryesore luftarake në Ukrainë, gjë që është zotuar edhe nga vende të tjera, duke përfshirë SHBA-në dhe Gjermaninë.

Presidenti ukrainas vizitoi Berlinin, Romën dhe Parisin në fundjavë për të takuar liderët evropianë teksa kërkon të fitojë mbështetje shtesë ushtarake dhe financiare për Ukrainën.

Thirrje NATO-s që të pranojë Ukrainën në anëtarësim

Presidenti ukrainas ripërtëriti të hënën thirrjen e tij ndaj NATO-s për të marrë një “vendim politik pozitiv” për ofertën e anëtarësimit të Kievit në samitin e korrikut.

Partnerët perëndimorë i kanë dhënë Ukrainës armë për të luftuar pushtimin rus. Por Kievi dëshiron garanci më të forta sigurie për të ardhmen dhe shpreson të bashkohet me aleancën ushtarake të NATO-s, e cila do të mbajë një samit në Vilnius në korrik.

“Është koha për të hequr pasigurinë më të madhe të sigurisë në Evropë – domethënë, për të konfirmuar një vendim pozitiv politik për anëtarësimin e Ukrainës në NATO,” tha ai në një fjalim video në samitin e demokracisë në Kopenhagë, duke i kërkuar aleancës që të marrë një vendim në Korrik./VOA/