Vulin e quan Mlladiqin “hero” dhe falënderon Rusinë për mbështetjen ndaj tij në Hagë

Ish-shefi i Agjencisë serbe të Inteligjencës dhe Sigurisë (BIA), Aleksandar Vulin, ka shprehur mirënjohje ndaj Rusisë për mbështetjen që, sipas tij, i ka dhënë ish-komandantit serb të Bosnjës, Ratko Mladiq, gjatë kohës së vuajtjes së dënimit në Hagë.

Vulin, aktualisht kryetar i Lëvizjes Socialiste në Serbi, e ka cilësuar Mladiqin “hero serb” dhe “hero të të gjithë njerëzve të lirë”, pavarësisht se ai është dënuar nga Tribunali Penal Ndërkombëtar për ish-Jugosllavinë për gjenocid, krime kundër njerëzimit dhe krime lufte.

Duke folur për Sputnik, Vulin tha se është “mirënjohës ndaj shtetit rus për ndihmën aktive” në përmirësimin e kushteve dhe pozitës së Mladiqit gjatë qëndrimit të tij në burgun e Hagës.

“Jam mirënjohës ndaj shtetit rus për ndihmën aktive në përmirësimin e pozicionit të gjeneralit Mladiq në burgun e Hagës”, tha Vulin.

Ai shprehu gjithashtu keqardhje që, sipas tij, nuk ishte arritur lirimi i Mladiqit.

“Më vjen keq që të gjithë së bashku nuk arritëm ta lironim”, tha ai.

Vulin sulmoi ashpër edhe Tribunalin e Hagës, duke pretenduar se qëllimi i tij nuk ka qenë vendosja e drejtësisë, por hakmarrja ndaj serbëve.

“Tribunali i Hagës nuk është aty për të gjetur drejtësi, Tribunali i Hagës është aty për t’u hakmarrë ndaj serbëve”, deklaroi Vulin.

Ai më tej e paraqiti pjesëmarrjen e njerëzve në ceremonitë mortore për Mladiqin si një “fitore”, duke thënë se presioni ndërkombëtar nuk mund ta ndryshojë qëndrimin e një pjese të shoqërisë serbe ndaj tij.

“Populli serb zgjodhi të ishte me gjeneralin Mladiq, populli serb zgjodhi të ishte i lirë”, tha Vulin.

Ratko Mladiq, ish-komandant i Ushtrisë së Republika Srpska gjatë luftës në Bosnje dhe Hercegovinë, u arrestua në Serbi në vitin 2011 dhe iu dorëzua Tribunalit të Hagës.

Ai u shpall fajtor për krimet më të rënda të kryera gjatë luftës në Bosnje, përfshirë gjenocidin në Srebrenicë, ku në vitin 1995 u vranë më shumë se 8 mijë burra dhe djem boshnjakë.

Në vitin 2021, mekanizmi pasues i Tribunalit të Hagës la në fuqi dënimin e përjetshëm ndaj Mladiqit.

Deklaratat e Vulinit vijnë në një kohë kur në Serbi vazhdon të jetë e pranishme një përplasje e fortë mbi mënyrën se si trajtohet trashëgimia e luftërave të viteve ’90 dhe figura e personave të dënuar për krime lufte.

The GeoPost