Si po e mban Vuçiq në paraburgim avokatin që ngriti alarmin për rolin e presidentit serb në “Sarajevo Safari”

Aktivistë, avokatë dhe kundërshtarë të regjimit të presidentit serb Aleksandar Vuçiq u mblodhën të shtunën para Pallatit të Drejtësisë në Beograd, duke kërkuar lirimin e avokatit dhe aktivistit Çedomir Stojkoviq, i cili ndodhet në paraburgim.

Protestuesit e cilësuan Stojkoviqin si të burgosur politik, duke pretenduar se ndalimi i tij lidhet me aktivitetin e tij publik dhe me deklaratat kritike që ka bërë ndaj presidentit serb.

Sipas pjesëmarrësve në protestë, Stojkoviq kishte ngritur alarmin për rolin e mundshëm të Vuçiqit në të ashtuquajturin “Sarajevo Safari”, një çështje që po hetohet dhe që ka rikthyer debat në opinionin publik.

Në tubim morën pjesë disa figura të njohura nga shoqëria civile dhe politika opozitare, përfshirë avokatin dhe nënkryetarin e Lidhjes së Social Demokratëve të Vojvodinës Aleksandar Olenik, si dhe aktivisten për të drejtat e njeriut Natasha Kandiq.

Kandiq reagoi përmes rrjeteve sociale duke e cilësuar ndalimin e Stojkoviqit si të paligjshëm.

“Protestë për ndalimin e paligjshëm. Çeda Stojkoviq është në paraburgim sepse publikoi informacion se Škoda po ndërpret kontratën me BIA-n, dhe duket se kjo është një heshtje institucionale për shkak të hetimit për ‘Sarajevo Safari’”, shkroi ajo.

Organizatorët kërkuan lirimin e menjëhershëm të Stojkoviqit dhe zhvillimin e një hetimi të pavarur për rastin, duke deklaruar se arrestimi i tij është një përpjekje për të heshtur zërat kritikë ndaj pushtetit në Serbi.

Protesta u zhvillua pa incidente, ndërsa pjesëmarrësit paralajmëruan se do të vazhdojnë me tubime të tjera derisa avokati të lirohet.

Avokati nga Beogradi dhe aktivisti në rrjetet sociale, Stojkoviq, ishte arrestuar në dhjetor në Beograd dhe më pas ishte liruar për t’u mbrojtur në liri.

Pas lirimit, ai shkroi në Facebook për të sqaruar rrethanat e arrestimit, duke thënë se i ishte ndaluar postimi në rrjetin social X (Twitter) dhe në platformën YouTube, si dhe se i ishte konfiskuar telefoni celular, raportojnë mediat rajonale.

Sipas tij, arrestimi u justifikua zyrtarisht me postime të mëhershme në rrjetin X, ku ai kishte komentuar mbi protestat Euromaidan në Ukrainë dhe kishte përmendur presidentin serb.

Megjithatë, Stojkoviq pretendon se arsyeja e vërtetë e arrestimit lidhet me kallëzimin penal që ai ka paraqitur kundër Vuçiqit për shkak të pretendimeve mbi lidhjen e tij me të ashtuquajturin “Sarajevo Sniper Safari”.

Ai ka deklaruar se postimet e tij mbi këtë temë kishin tërhequr vëmendjen e mediave ndërkombëtare dhe se arrestimi përbën censurë politike.

Termi “Sarajevo Safari” i referohet pretendimeve se gjatë Rrethimi i Sarajevës (1992–1996), civilë në qytet u qëlluan nga snajperë, përfshirë edhe të huaj, një çështje që u rikthye në vëmendje pas publikimit të dokumentarit Sarajevo Safari.

Në nëntor të vitit 2025, Prokuroria e Milanos hapi një hetim për të shqyrtuar dyshimet se shtetas italianë mund të kenë qenë të përfshirë në këto ngjarje gjatë luftës në Bosnje dhe Hercegovinë.

The Geopost