Senati i Nju-Jorkut miraton Rezolutë të posaçme për 18-vjetorin e pavarësisë së Kosovës

Senati i shtetit të Nju-Jorkut ka miratuar një Rezolutë të posaçme me rastin e shënimit të 18-vjetorit të shpalljes së pavarësisë së Republikës së Kosovës, duke nderuar datën historike të 17 shkurtit 2008.

Dokumenti, i sponsorizuar nga senatorja Jessica Scarcella-Spanton dhe i mbështetur nga dhjetëra bashkë-sponsorë nga të dy partitë kryesore politike në Shtetet e Bashkuara, përfaqëson një nderim zyrtar institucional për shtetin e Kosovës dhe rrugëtimin e tij si një nga vendet më të reja në Evropë.

Rezoluta vlerëson progresin e Kosovës në ndërtimin e institucioneve shtetërore dhe demokratike, duke theksuar njëkohësisht rëndësinë e partneritetit të fortë dhe të qëndrueshëm ndërmjet Shteteve të Bashkuara të Amerikës dhe Republikës së Kosovës.

Në dokument, Senati i Nju-Jorkut vë në pah edhe rolin e komunitetit kosovar në këtë shtet, duke theksuar kontributin e tij të rëndësishëm në zhvillimin kulturor, ekonomik dhe shoqëror të qytetit dhe më gjerë në shtetin e Nju-Jorkut.

Gjatë procesit të votimit, shumica dërrmuese e senatorëve u bashkuan për të njohur rrugëtimin historik të Kosovës, rolin e saj në promovimin e vlerave demokratike, si dhe përpjekjet për zhvillim të qëndrueshëm dhe stabilitet në rajon.

Rezoluta rikujton historinë e pavarësisë së Kosovës, duke përfshirë periudhën e luftës së viteve 1998–1999, ndërhyrjen e NATO-s për t’i dhënë fund dhunës dhe represionit, si dhe procesin e ndërtimit dhe konsolidimit të institucioneve shtetërore pas luftës. Po ashtu, dokumenti nënvizon rrënjët e thella historike të Kosovës, që nga periudha e Dardanisë së lashtë.

Senati i Nju-Jorkut thekson se qytetarët e Kosovës kanë arsye të jenë krenarë për arritjet e deritanishme në ndërtimin e institucioneve demokratike, forcimin e sundimit të ligjit dhe krijimin e mundësive ekonomike për të ardhmen.

Në përmbyllje, organi legjislativ i shtetit të Nju-Jorkut shpreh urimet e tij për popullin e Kosovës, duke e cilësuar Republikën e Kosovës si mik, partner dhe aleat të ngushtë të Shteteve të Bashkuara të Amerikës.

Rezoluta mbyllet me një mesazh të qartë simbolik, duke theksuar se Senati i Nju-Jorkut ndalon punimet për të përkujtuar 18-vjetorin e pavarësisë së Kosovës, duke nderuar të kaluarën, duke njohur të tashmen dhe duke pritur me optimizëm të ardhmen e vendit.

The Geo Post