Rutte: Jemi në kontakt me Vuçiqin, NATO pret llogaridhënie nga Serbia për sulmin në Banjskë

Sekretari i Përgjithshëm i NATO-s, Mark Rutte, ka deklaruar se Aleanca po i ndjek nga afër zhvillimet në Ballkanin Perëndimor, përfshirë edhe situatën në Kosovë, duke theksuar se pret ende llogaridhënie nga Beogradi për ngjarjet e vitit 2023 në Banjskë.

Në një konferencë për media në selinë e NATO-s në Bruksel, para takimit të ministrave të Mbrojtjes që do të mbahet më 12 shkurt, Rutte tha se është në kontakt të vazhdueshëm me presidentin e Serbisë dhe se çështja e Banjskës mbetet e hapur.

“Unë vetë, por edhe si aleancë, jam në kontakt të ngushtë me presidentin serb. Ne ende po presim llogaridhënien e tij për atë që ndodhi në vitin 2023 në Banjska dhe ngjarjet e tjera gjatë atij viti. Nuk ka shumë gjëra të reja për të raportuar, por ne i ndjekim zhvillimet nga afër”, deklaroi Rutte.

Ai theksoi se përmes misionit paqeruajtës KFOR dhe angazhimeve të tjera në rajon, NATO mbetet thellësisht e përfshirë në ruajtjen e stabilitetit.

“Përmes KFOR-it dhe aktiviteteve të tjera të Aleancës në Ballkanin Perëndimor, në Bosnjë dhe Hercegovinë, por edhe në Kosovë, ne jemi shumë të angazhuar dhe i ndjekim gjërat nga afër”, u shpreh ai.

Rutte bëri të ditur se pesë vende anëtare të NATO-s nga Ballkani Perëndimor – Shqipëria, Mali i Zi, Maqedonia e Veriut, Sllovenia dhe Kroacia – informojnë rregullisht Aleancën për zhvillimet në rajon.

Po ashtu, ai theksoi se NATO nuk do të lejojë krijimin e një vakumi sigurie në Bosnjë dhe Hercegovinë, duke shtuar se situata atje po monitorohet me kujdes.

Të enjten, më 12 shkurt, ministrat e Mbrojtjes të vendeve anëtare do të mblidhen në selinë e NATO-s në Bruksel në kuadër të takimit të radhës ministror, i cili do të drejtohet nga vetë Sekretari i Përgjithshëm, Mark Rutte.

Një zyrtar i NATO-s ka theksuar se Ballkani Perëndimor mbetet rajon me rëndësi strategjike për Aleancën./Thegeopost.