Kosova e shpall organizatë terroriste Gardën Revolucionare Islamike të Iranit

Qeveria e Kosovës ka shpallur si organizatë terroriste Korpusin e Gardës Revolucionare Islamike, në një mbledhje të mbajtur të hënën në Prishtinë.

Kryeministri Albin Kurti deklaroi se vendimi përfaqëson një qëndrim të qartë të shtetit në mbrojtje të sigurisë ndërkombëtare dhe vlerave demokratike.

“Përmes këtij vendimi, Kosova e forcon qëndrimin e saj në mbrojtjen e sigurisë ndërkombëtare, vlerave demokratike dhe të drejtave të njeriut. Ky është rreshtim i qartë përkrah aleatëve tanë strategjikë në luftën kundër terrorizmit”, tha Kurti.

Ai e cilësoi IRGC-në si një strukturë që përdor terrorizmin dhe dhunën e organizuar si instrument të politikës së jashtme, duke kontribuar në destabilizimin rajonal dhe global.

Korpusi i Gardës Revolucionare Islamike është krahu ideologjik i ushtrisë së Iranit dhe u themelua pas Revolucionit Iranian, me qëllim mbrojtjen e rendit klerikal në vend. Përveç rolit ushtarak, Garda ka ndikim të gjerë edhe në ekonomi, duke kontrolluar sektorë strategjikë në Iran.

Disa vende, përfshirë Shtetet e Bashkuara të Amerikës, e kanë shpallur më herët IRGC-në organizatë terroriste. Së fundmi, edhe Bashkimi Evropian ndërmori një hap të ngjashëm pas shtypjes së protestave antiqeveritare në Iran.

Sipas organizatave për të drejtat e njeriut, mbi 6 mijë persona janë vrarë gjatë këtyre protestave, ku forcat e sigurisë – përfshirë Gardën Revolucionare – akuzohen për përdorim të dhunës vdekjeprurëse ndaj protestuesve.

Irani, me mbi 91 milionë banorë, nuk e njeh Kosovën si shtet dhe nuk ka marrëdhënie diplomatike zyrtare me Prishtinën.

Përfshirja e një organizate në listën e zezë zakonisht nënkupton ngrirjen e aseteve dhe vendosjen e kufizimeve të vizave për drejtuesit dhe anëtarët e saj.

The Geopost