BE i jep Shqipërisë 21 milionë euro për forcimin e mbrojtjes

Ministri shqiptar i Mbrojtjes, Ermal Nufi, ka njoftuar se Shqipëri ka siguruar një tjetër mbështetje të rëndësishme nga Bashkimi Evropian për forcimin e kapaciteteve të saj ushtarake.

Në një reagim të publikuar në rrjetet sociale, ministri bëri të ditur se Këshilli i Bashkimit Evropian ka miratuar paketën e tretë të asistencës për Shqipërinë në kuadër të programit European Peace Facility, me vlerë prej 21 milionë eurosh.

Sipas tij, me këtë vendim, mbështetja totale e Bashkimit Evropian për Shqipërinë në fushën e mbrojtjes arrin në 49 milionë euro.

Paketa e re e asistencës përfshin furnizimin e Forcave të Armatosura të Shqipërisë me mjete të blinduara të lehta, mjete taktike dhe inxhinierike, si dhe trajnim dhe mbështetje operacionale për personelin ushtarak.

Ministri Nufi e cilësoi vendimin si një vlerësim konkret për seriozitetin dhe besueshmërinë e Shqipërisë si partnere në fushën e sigurisë dhe mbrojtjes.

Ai theksoi se Shqipëria vazhdon të luajë rol aktiv përkrah aleatëve dhe partnerëve evropianë në çështjet e sigurisë, duke kontribuar në arkitekturën e mbrojtjes kolektive.

Sipas ministrit, ky vendim i Bashkimit Evropian konfirmon edhe një herë angazhimin e Shqipërisë në strukturat euroatlantike dhe rrit besueshmërinë e saj si partner i qëndrueshëm në mbrojtjen dhe sigurinë rajonale.

Mbështetja e re financiare vjen në një periudhë kur vendet e rajonit dhe aleatët evropianë po intensifikojnë investimet në modernizimin e kapaciteteve mbrojtëse dhe në rritjen e bashkëpunimit strategjik në fushën e sigurisë.

The GeoPost