Padi kundër Serbisë në Strasburg për pasivizimin e adresave të shqiptarëve në Luginën e Preshevës

Gjykata Evropiane për të Drejtat e Njeriut ka regjistruar për herë të parë një padi kundër Serbia, që lidhet me praktikën e pasivizimit të adresave të shqiptarëve që jetojnë në Lugina e Preshevës.

Lajmin e ka bërë të ditur avokati Drini Grazhdan, i cili ka dorëzuar padinë në emër të qytetares Teuta Fazliu, duke e cilësuar regjistrimin e saj si një hap procedural tejet të rëndësishëm.

Sipas Grazhdanit, padia ka të bëjë me shkelje të të drejtave të njeriut që kanë ndodhur përmes pasivizimit administrativ të adresave të shqiptarëve në Preshevë, Medvegjë dhe Bujanoc.

Ai ka theksuar se kjo praktikë përbën, sipas tij, “spastrim etnik administrativ”, pasi prek jo vetëm shqiptarët që punojnë jashtë vendit, por edhe ata që jetojnë brenda Serbisë.

“Pasivizimi i adresave nuk është simbolik. Ai i detyron shqiptarët të largohen, pasi humbasin të drejtën për letërnjoftim dhe pasaportë të re, pension, sigurim shëndetësor, të drejtën e votës dhe shërbime të tjera themelore”, ka deklaruar avokati.

Ai ka vlerësuar se fakti që Gjykata e Strasburgut e ka regjistruar padinë dhe e ka pajisur me numër aplikimi është një zhvillim shumë domethënës, duke pasur parasysh se mbi 90 për qind e rasteve refuzohen që në fazën fillestare.

Grazhdan ka bërë të ditur se synimi i tij kryesor është që Gjykata të zbatojë procedurën e vendimit pilot, e cila do ta shndërronte këtë çështje në një rast me efekt të përgjithshëm.

Kjo do të nënkuptonte, sipas tij, që Serbia të detyrohet të ndalojë praktikën sistematike të pasivizimit të adresave dhe ta zbatojë vendimin për të gjitha rastet e ngjashme.

Në të njëjtën kohë, ai u ka bërë thirrje të gjithë shqiptarëve të prekur nga kjo praktikë që të ndjekin procedurat ligjore brenda Serbisë, edhe pse, siç tha ai, autoritetet serbe i refuzojnë zakonisht këto ankesa.

“Kjo është një fitore fillestare, por shumë e rëndësishme. Do të jem i përkushtuar që ky proces të përfundojë me një fitore të plotë”, ka deklaruar Grazhdan.

The Geopost