Gjatë festimit të Krishtlindjeve ortodokse, serbët shfaqin simbole nacionaliste provokuese në Graçanicë dhe Shillovë

Gjatë festimeve të Krishtlindjeve ortodokse, në disa zona me shumicë serbe në Kosovë, përfshirë Graçanicën dhe fshatin Shillovë të Gjilanit, janë shënuar raste të shfaqjes së simboleve dhe mesazheve nacionaliste.

Sipas pamjeve dhe informatave të publikuara në rrjete sociale, gjatë grumbullimeve festive janë parë flamuj dhe simbole me përmbajtje nacionaliste, të cilat janë drejtërdrejtë provokuese.

Në një video të publikuar në platformën sociale “Telegram”, të rinjt serbë shihen me një kamion “ushtarak”, teksa valvisin flamurin serb.

Ndërkaq, aty janë publikuar edhe disa fotografi të tjera, që kanë simbolikë të ngjashme.

Në fotografi shihen disa persona duke mbajtur flamuj dhe simbole nacionaliste serbe, të cilat kanë ngarkesë të qartë politike dhe simbolike, veçanërisht në kontekstin e Kosovës.

Flamuri me mbishkrimin “Приштина” (Prishtina) në alfabetin cirilik serb paraqet një pretendim simbolik territorial, duke e paraqitur kryeqytetin e Kosovës si pjesë të narrativës shtetërore serbe.

Ky është një mesazh i drejtpërdrejtë politik dhe jo fetar.

Flamuri tjetër me shqiponjën dykrenare serbe dhe elemente (forma e hartës së Kosovë) përdoret shpesh në kontekste mobilizuese ose provokuese ndaj shqiptarëve.

Prania e këtyre simboleve ka nxitur reagime në opinionin publik, veçanërisht për shkak të ndjeshmërisë ndëretnike dhe rëndësisë së ruajtjes së rendit publik gjatë festave fetare.

Policia e Kosovës ka qenë e pranishme në terren për të monitoruar situatën dhe për të garantuar mbarëvajtjen e festimeve, ndërsa deri më tani nuk është raportuar për incidente apo përshkallëzim të situatës./TheGeoPost.