FBI shkatërron një grup spiunazhi që vepronte me urdhër të Rusisë, në rrjet edhe një shtetas serbo-malazez

Departamenti i Drejtësisë i Shteteve të Bashkuara ka konfirmuar arrestimin e një personi të dyshuar si udhëheqës i një rrjeti të fshehtë që, sipas autoriteteve amerikane, vepronte me urdhër të Rusisë për të organizuar sulme ndaj disidentëve dhe kundërshtarëve të pushtetit rus jashtë vendit.

Sipas njoftimit zyrtar, në Kolumbi është arrestuar 42-vjeçari Denis Alimov, ndaj të cilit ishte lëshuar një urdhër arresti ndërkombëtar përmes Interpol. Ai akuzohet për pjesëmarrje në një komplot për rrëmbimin ose vrasjen e dy disidentëve të njohur jashtë Rusisë, si dhe për aktivitete të lidhura me terrorizmin.

Autoritetet amerikane kanë bërë të ditur se do të kërkojnë ekstradimin e tij në SHBA për t’u përballur me akuzat.

Në aktakuzë përmendet edhe emri i Darko Djuroviq, i cili sipas raportimeve të portalit Insajder është shtetas i Malit të Zi dhe Serbisë.

Sipas dokumenteve të prokurorisë, në tetor të vitit 2024 Alimov kishte organizuar një takim me Đuroviqin në një restorant pranë selisë së shërbimit të sigurisë së brendshme të një shteti të huaj. Gjatë këtij takimi, thuhet se ai i kishte dhënë rreth 60 mijë dollarë për financimin e planit dhe kishte premtuar edhe 1.5 milion dollarë për çdo vrasje ose rrëmbim të realizuar.

Autoritetet amerikane pretendojnë se dy të dyshuarit komunikonin me ndihmën e aplikacionit Google Translate për shkak të barrierës gjuhësore, ndërsa bisedat e tyre ishin monitoruar nga hetuesit amerikanë.

Sipas aktakuzës, Đuroviq kishte rol aktiv në organizimin e planit. Ai dyshohet se kishte hulumtuar për armë zjarri të tipit Glock, kishte planifikuar udhëtime në disa shtete evropiane për të lokalizuar objektivat dhe kishte rekrutuar edhe një person tjetër për të ndihmuar në gjetjen e tyre.

Dokumentet e hetimit theksojnë se ai kishte rol kyç në komunikim, planifikim dhe organizim të veprimeve të iniciuara nga Alimov.

Alimov akuzohet për komplot për kryerjen e vrasjes dhe rrëmbimit në një shtet të huaj, përpjekje për ofrim të mbështetjes materiale për terrorizëm dhe financim të terrorizmit. Për këto vepra parashihen dënime nga 15 deri në 20 vjet burg, ndërsa për komplot për vrasje dhe rrëmbim ekziston edhe mundësia e dënimit me burgim të përjetshëm.

Autoritetet amerikane kanë vlerësuar punën e FBI, veçanërisht zyrës së saj në Nju Jork për kundërzbulim, si dhe bashkëpunimin me institucionet partnere në Kolumbi gjatë këtij operacioni. /Pobjeda