Aktakuzë ndaj 21 personave për masakrën e Reçakut, Prokuroria kërkon gjykim në mungesë

Prokuroria Speciale e Republikës së Kosovës ka ngritur aktakuzë ndaj 21 personave për veprën penale “Krim i luftës kundër popullsisë civile”, lidhur me masakrën e kryer më 15 janar 1999 në fshatin Reçak të Komunës së Shtimes. Prokuroria ka propozuar që procesi gjyqësor të zhvillohet në mungesë të të akuzuarve.

Sipas aktakuzës, të pandehurit akuzohen se, gjatë një operacioni të forcave policore dhe ushtarake serbe, kanë vrarë 42 civilë shqiptarë.

Ata dyshohet se kanë vepruar në bashkëkryerje gjatë viteve 1998–1999, si pjesëtarë të Ushtrisë së ish-Jugosllavisë, konkretisht Brigadës së Mekanizuar 243 të Armatës së Tretë, e njohur si Korpusi i Prishtinës, si dhe si pjesëtarë të Ministrisë së Punëve të Brendshme të Serbisë.

Në njoftimin e Prokurorisë thuhet se, përveç vrasjeve, të akuzuarit kanë kryer edhe trajtim çnjerëzor ndaj civilëve, shkatërrim të pasurisë, dëbim masiv dhe spastrim etnik të popullsisë civile shqiptare.

Sipas hetimeve, forcat serbe fillimisht e kanë rrethuar fshatin Reçak nga disa zona përreth dhe më pas kanë ndërhyrë në fshat, duke hyrë shtëpi më shtëpi.

Civilët janë ndarë nga njëri-tjetri, ndërsa burrat e ndaluar janë ekzekutuar. Prokuroria thekson gjithashtu se civilët janë keqtrajtuar gjatë operacionit.

Si pasojë e këtyre veprimeve, sipas Prokurorisë Speciale, rreth 20 mijë civilë nga Reçaku dhe fshatrat përreth, përfshirë Topillën, Petrovën, Kraishtin, Mullapolcin dhe Dremjakun, janë dëbuar nga shtëpitë e tyre.

Prokuroria ka kërkuar që gjykimi të mbahet në mungesë, me arsyetimin se të pandehurit ndodhen jashtë territorit të Kosovës dhe janë të paarritshëm për organet e drejtësisë./TheGeoPost.