Aksion i madh policor në aeroportin e Beogradit, arrestohet ish-ministri i Vuçiqit

 Ish-ministri i Ekonomisë i Serbisë dhe zyrtari i lartë i Partisë Progresive Serbe (SNS), Rade Basta, është arrestuar të mërkurën në aeroportin e Beogradit, në kuadër të një operacioni të madh policor të urdhëruar nga Prokuroria e Lartë Publike në kryeqytetin serb.

Së bashku me Bastën janë arrestuar edhe disa persona të tjerë, të cilët dyshohen për përvetësim të parave nga ndërmarrja publike “Belgrade Power Plants”, gjatë periudhës kur Basta drejtonte këtë kompani.

Sipas gazetës serbe “Blic”, arrestimi i ish-ministrit është kryer në aeroport, pak para se ai të tentonte të largohej nga Serbia.

Të dyshuarit akuzohen se, përmes veprimeve të tyre, kanë shkaktuar dëme financiare prej dhjetëra milionë dinarësh serbë ndaj ndërmarrjes publike.

Rade Basta ishte në krye të kompanisë “Belgrade Power Plants” përpara se të merrte drejtimin e Ministrisë së Ekonomisë në tetor të vitit 2022.

Ai u bë i njohur për opinionin publik serb në vitin 2023, kur doli hapur në mbështetje të vendosjes së sanksioneve ndaj Rusisë për shkak të pushtimit të Ukrainës.

Qëndrimi i tij shkaktoi përplasje brenda koalicionit të atëhershëm qeverisës në Serbi, ndërsa në korrik të vitit 2023 ai u shkarkua nga posti i ministrit të Ekonomisë.

Basta e kishte marrë këtë detyrë si përfaqësues i partisë Serbia e Bashkuar, e themeluar nga politikani i ndjerë Dragan Markoviq Palma, e cila ishte partnere e koalicionit me Partinë Socialiste të Serbisë (SPS), të udhëhequr nga Ivica Daçiq.

Pas përplasjes me udhëheqjen e partisë, ai themeloi lëvizjen e tij politike, të quajtur “Rruga Evropiane”.

The GeoPost