Kushner dhe Witkoff paralajmërojnë fazë të re në bisedimet për paqe në Ukrainë

Të dërguarit amerikanë për paqe, Jared Kushner dhe Steve Witkoff, kanë paralajmëruar një moment të ri në përpjekjet diplomatike për përfundimin e luftës në Ukrainë, pas një takimi me presidentin ukrainas Volodymyr Zelensky në Kiev.

Sipas Kushner, Shtetet e Bashkuara po punojnë për ndërtimin e një “pakete paqeje”, me synimin që negociatat e ardhshme të kalojnë në një format trepalësh mes Ukrainës, Rusisë dhe SHBA-së.

Takimi në Kiev vjen një ditë pasi delegacioni amerikan zhvilloi rreth tre orë bisedime me presidentin rus Vladimir Putin në Moskë.

Kushner, dhëndri i presidentit amerikan Donald Trump, tha se shpreson që raundi i ardhshëm i bisedimeve të përfshijë drejtpërdrejt të tri palët.

Ndërkohë, Witkoff u shpreh optimist për ecurinë e kontakteve diplomatike, si në Moskë ashtu edhe në Kiev.

Ai tha se SHBA-ja synon të gjejë një “zgjidhje diplomatike” për luftën, dhe jo një “zgjidhje kinetike”, duke lënë të kuptohet se fokusi mbetet te negociatat dhe jo te përshkallëzimi ushtarak.

Witkoff bëri të ditur se delegacioni amerikan kishte “dëgjuar ide të reja” gjatë takimeve në Moskë, por pa dhënë hollësi për përmbajtjen e tyre.

Sipas tij, pritet që “së shpejti” të njoftohet një raund i ri bisedimesh mes Ukrainës dhe Rusisë, me ndërmjetësimin e Shteteve të Bashkuara.

Zhvillimet e fundit sugjerojnë se Uashingtoni po përpiqet të intensifikojë rolin ndërmjetësues mes Kievit dhe Moskës, në një përpjekje për të krijuar një kornizë të re negociuese për përfundimin e luftës.

The GeoPost