Gjermania akuzon zyrtarisht Rusinë për sabotazhin në Leipzig – mbyllet konsullata ruse në Bon dhe shtrëngohen kontrollet

Autoritetet gjermane kanë akuzuar zyrtarisht Rusinë për përfshirje në tentativën e sabotimit të një avioni mallrash ukrainas An-124 në Aeroportin e Leipzigut.

Ministri i Brendshëm gjerman, Alexander Dobrindt, dhe ministri i Jashtëm, Johann Wadephul, e bënë publik qëndrimin e Berlinit gjatë një konference për media, duke e cilësuar incidentin si pjesë të veprimeve hibride të Rusisë.

Dobrindt deklaroi se rezultatet e hetimeve policore, “tiparet karakteristike” të incidentit dhe të dhënat e inteligjencës “tregojnë qartë përfshirjen ruse në veprime hibride që u planifikuan, u kryen dhe gjithashtu u parandaluan”.

Sipas autoriteteve gjermane, incidenti lidhet me një dron të pajisur me eksplozivë, i cili u gjet pranë një avioni transporti ukrainas An-124 në Leipzig.

Pas akuzave, Berlini ka njoftuar edhe një seri masash kundër Rusisë.

Ministri i Jashtëm Wadephul bëri të ditur se Gjermania do të mbyllë Konsullatën e Përgjithshme Ruse në Bon, si dhe Shtëpinë Ruse në Berlin. Përfaqësuesi diplomatik i Moskës në Gjermani do të thirret në Ministrinë e Jashtme për t’u përballur me autoritetet gjermane.

Gjithashtu, Berlini planifikon të shtrëngojë kontrollet për hyrjen e qytetarëve rusë në Gjermani, megjithëse detajet e masave të reja ende nuk janë bërë publike.

BE-ja dhe NATO-ja mbështesin Gjermaninë

Pas njoftimit të Berlinit, reagime të forta kanë ardhur edhe nga Bashkimi Evropian dhe NATO-ja.

Presidentja e Komisionit Evropian, Ursula von der Leyen, deklaroi se BE-ja qëndron “në solidaritet të plotë me Gjermaninë përballë këtij sulmi nga Rusia”. Ajo bëri të ditur se do ta diskutonte çështjen me sekretarin e përgjithshëm të NATO-s, Mark Rutte, ndërsa ministrat e Jashtëm të BE-së do të punojnë për përgatitjen e sanksioneve të reja ndaj Moskës.

Edhe Rutte e mbështeti qëndrimin e Berlinit, duke deklaruar se provat për përfshirjen ruse në sabotim janë “të qarta” dhe duke mirëpritur masat hakmarrëse të Gjermanisë.

Presidenti finlandez Alexander Stubb, kryeministri polak Donald Tusk, Ministria e Jashtme e Letonisë dhe përfaqësues të tjerë të vendeve të BE-së shprehën gjithashtu solidaritet me Gjermaninë dhe mbështetën vazhdimin e ndihmës për Ukrainën.

Kremlini ka kundërshtuar akuzat gjermane.

Zëdhënësja e Ministrisë së Jashtme ruse, Maria Zakharova, i cilësoi masat e Berlinit si të pabazuara dhe tha se Gjermania kishte “shpikur një pretekst”. Ajo paralajmëroi gjithashtu se Rusia do t’i përgjigjet vendimit për mbylljen e Shtëpisë Ruse në Berlin.

Edhe zëdhënësi i Kremlinit, Dmitry Peskov, e akuzoi Gjermaninë për ndjekjen e një “rruge të mëtejshme përshkallëzimi”.

Peskov vuri në pikëpyetje bazën e akuzave gjermane, duke deklaruar se pretendime kaq të rënda duhet të mbështeten me prova dhe se, sipas tij, Berlini nuk kishte paraqitur argumente të mjaftueshme.

Dronë me eksplozivë pranë avionit ukrainas

Incidenti në Aeroportin e Leipzigut ndodhi natën e 5 gushtit, kur një dron me eksplozivë të bashkangjitur u zbulua pranë një avioni transporti ukrainas An-124.

Avioni, sipas raportimeve të cituara nga autoritetet, transportonte municione.

Hetimet zbuluan më pas edhe raste të tjera. Një tjetër dron u gjet rreth dhjetë ditë më vonë në perëndim të aeroportit, ndërsa një tjetër dyshohet se mund të jetë përplasur me një avion mallrash.

Megjithatë, për këtë rast të fundit nuk është gjetur asnjë gjurmë e dronit.

Akuza e drejtpërdrejtë e Gjermanisë ndaj Rusisë e rrit më tej tensionin mes Berlinit dhe Moskës, ndërsa incidenti po trajtohet nga autoritetet gjermane si pjesë e një serie veprimesh hibride që synojnë të cenojnë sigurinë dhe mbështetjen perëndimore për Ukrainën.

The GeoPost