Kryeministri i Kroacisë, Andrej Plenkoviq, ka dënuar mundësinë që Serbia të organizojë funeral me nderime shtetërore dhe ushtarake për ish-komandantin e Ushtrisë së Serbëve të Bosnjës, Ratko Mladiq, i dënuar për krime lufte dhe gjenocid.
Plenkoviq, i cili ndodhet në Slloveni për Forumin Strategjik të Bledit, tha se kishte dëgjuar për mundësinë e një ceremonie të tillë, por se ende nuk ishte marrë një vendim përfundimtar.
“Mladiq është një kriminel lufte, i cili ishte komandant në Knin dhe përgjegjës për krimet më të rënda në Shkabrnja dhe pjesë të tjera të Kroacisë”, deklaroi Plenkoviq.
Duke folur për pasojat e mundshme politike të një vendimi të tillë, kryeministri kroat e lidhi çështjen drejtpërdrejt me aspiratat e Serbisë për anëtarësim në Bashkimin Evropian.
“Është sikur po i mbyllin dyert e Bashkimit Evropian për veten e tyre”, tha ai.
Plenkoviq shtoi se për këtë çështje kishte diskutuar edhe me disa pjesëmarrës të tjerë të Forumit Strategjik të Bledit, pa bërë të ditur identitetin e tyre.
Debati u rikthye pas deklaratës së ministrit serb të Drejtësisë, Nenad Vujiq, i cili tha se Mladiqi do të varrosej me nderimet më të larta shtetërore dhe ushtarake.
Megjithatë, presidenti serb Aleksandar Vuçiq e mohoi më vonë se ishte marrë një vendim i tillë. Ai tha se vendimi për funeralin dhe ceremoninë e varrimit ende nuk ishte marrë nga familjarët e Mladiqit.
Ratko Mladiq, ish-komandant i Ushtrisë së Republika Srpska, u dënua për gjenocid, krime kundër njerëzimit dhe shkelje të ligjeve e zakoneve të luftës gjatë luftës në Bosnje dhe Hercegovinë. Ai u shpall përfundimisht fajtor nga mekanizmi gjyqësor i Kombeve të Bashkuara në vitin 2021 dhe u dënua me burgim të përjetshëm.
Në të njëjtën linjë, Kroacia kishte reaguar edhe më herët ndaj një tjetër rasti që përfshinte Malin e Zi. Kryetari i Kuvendit të Malit të Zi, Andrija Mandiq, i kishte dërguar mesazh ngushëllimi familjes së Mladiqit pas vdekjes së tij.
Ministria e Jashtme e Kroacisë e kishte dënuar këtë veprim, duke vlerësuar se akte të tilla janë të papajtueshme me rrugën evropiane të Malit të Zi.
The GeoPost
Shtetasi rus dyshohet për vrasje të trefishtë në Mal të Zi – policia paralajmëron se është i armatosur 
Çanak: Ratko Mlladiqi nuk është hero, por kriminel lufte – Serbia po tenton ta glorifikojë 
Kongresi amerikan kërkon masa ndaj Serbisë së Vuçiqit: Në shënjestër lidhjet me Rusinë dhe Kinën 
Nga Moska te Pekini: Kina po merr rol kyç në energjinë e Serbisë 
Dënohen dy të akuzuar për barrikadat në veri, për katër të tjerë gjyqi nis më 15 shtator 
“Ata e dëgjuan Vuçiqin dhe humbën gjithçka” – Stojkoviq rikthen rolin e tij në luftërat e viteve ’90