Vuçiqi flet me gjuhën e armëve: Rikthen shërbimin ushtarak dhe hap fabrikë dronësh

Presidenti i Serbisë, Aleksandar Vuçiq, e shfrytëzoi shënimin e Vidovdanit për një demonstrim të ri të fuqisë ushtarake, duke njoftuar në aeroportin ushtarak në Batajnicë se Serbia do ta rikthejë përfundimisht shërbimin e detyrueshëm ushtarak duke filluar nga muaji mars.

Me një retorikë të ashpër që kujton politikat e viteve nëntëdhjetë, Vuçiq deklaroi se ushtria do të bëhet “edhe më e fortë”, duke dërguar një mesazh të qartë për rajonin dhe partnerët perëndimorë pikërisht në një datë me simbolikë të rëndë historike dhe nacionaliste.

Përveç dërgimit të të rinjve dhe të rejave në kazerma, ai paralajmëroi import masiv të armatimit të ri, si dhe nisjen urgjente të një fabrike për prodhimin e dronëve luftarakë.

Gjatë paraqitjes ushtarake të organizuar për Vidovdan në Batajnicë, ku ishin të rreshtuar drejtuesit më të lartë ushtarakë së bashku me ministrin Gašiq dhe gjeneralin Mojsiloviq, Vuçiq njoftoi përshpejtimin e procedurave për rikthimin e shërbimit ushtarak nga muaji mars, si dhe blerjen jotransparente të armatimit të ri.

Ai u tha qytetarëve se “ka edhe shumë gjëra të tjera që po vijnë”, pa zbuluar koston dhe origjinën e kësaj pajisjeje ushtarake.

Gjithashtu, zgjedhja e Vidovdanit për t’u bërë të ditur të rinjve se nga marsi do të shkojnë në kazerma, e shoqëruar me njoftime për fabrika të reja të dronëve, vështirë se mund të konsiderohet rastësi.

Beogradi duket se e përdor këtë datë për të rritur tensionet dhe për të demonstruar forcën ushtarake.

Me veprime të tilla, Serbia rikthehet te politika e vjetër e frikësimit të fqinjëve, duke rrezikuar njëkohësisht izolimin e saj në skenën ndërkombëtare.

The Geopost