Ish-sekretari Lord Robertson: Çlirimi i Kosovës një nga ditët më të lumtura të jetës sime

Në kuadër të aktiviteteve për shënimin e 27-vjetorit të Çlirimit të Kosovës, në Bibliotekën Kombëtare të Kosovës “Pjetër Bogdani” në Prishtinë është hapur ekspozita fotodokumentare “KFOR and Kosova +25”, e cila sjell para publikut një rrëfim vizual të periudhës së pasluftës dhe viteve të para të rindërtimit të vendit.

Ekspozita është organizuar nga Biblioteka Kombëtare e Kosovës dhe Muzeu Kombëtar i Kosovës, në bashkëpunim me organizatën Heartstone, dhe paraqet fotografi të realizuara gjatë viteve 2000 dhe 2001 nga fotografi dokumentar britanik Nick Sidle.

Përmes objektivit të tij, dokumentohen jo vetëm aktivitetet e forcave paqeruajtëse të KFOR-it në Kosovë, por edhe përditshmëria e qytetarëve, sfidat e periudhës së pasluftës, procesi i rindërtimit dhe shpresat e një shoqërie që po dilte nga pasojat e konfliktit.

Fotografitë e ekspozuara ofrojnë një pasqyrë të rrallë të realitetit të Kosovës në vitet e para pas çlirimit, duke kapur momente të bashkëpunimit mes komuniteteve lokale dhe trupave ndërkombëtare, si dhe transformimet që po ndodhnin në vend në atë periudhë.

Në ceremoninë e hapjes ka marrë pjesë edhe ish-sekretari i përgjithshëm i NATO-s, Lord Robertson, i cili kishte ndihmuar në sigurimin e qasjes dhe organizimin e ekspozitës në fillim të viteve 2000-2001, si dhe në aktivitetet e organizuara në kuadër të 25-vjetorit të KFOR-it në Kosovë.

Duke folur para të pranishmëve, Robertson tha se ngjarjet e Kosovës mbeten ndër kujtimet më të rëndësishme të jetës së tij politike.

“Çlirimi i Kosovës ka qenë një nga ditët më të lumtura të jetës sime dhe vizita ime e parë atje pas çlirimit ishte një moment i rëndësishëm në të gjithë karrierën time të gjatë politike. Kjo ekspozitë dhe këto fotografi të jashtëzakonshme, së bashku me historitë që ato bartin, përmbledhin një nga periudhat më të paharrueshme të Evropës që nga përfundimi i Luftës së Dytë Botërore”, tha Robertson.

Ai vlerësoi se ekspozita ka vlerë të veçantë historike, edukative dhe frymëzuese, duke ofruar një mundësi për brezat e rinj që të njihen me sfidat dhe zhvillimet që shënuan Kosovën në vitet e para të lirisë.

Ekspozita “KFOR and Kosova +25” do të qëndrojë e hapur për vizitorët në ambientet e Bibliotekës Kombëtare, duke ofruar një udhëtim përmes fotografive që dokumentojnë një nga periudhat më të rëndësishme në historinë e Kosovës moderne.

The GeoPost