Kos: Ka zhvillime inkurajuese lidhur me pesë shtetet që s’e njohin Kosovën

Komisionarja për Zgjerim e Bashkimit Evropian, Marta Kos, i cilësoi si “inkurajuese” zhvillimet rreth pesë shteteve anëtare të BE-së që ende nuk e njohin pavarësinë e Kosovës.

Ajo i bëri këto komente gjatë një mbledhjeje të jashtëzakonshme të Komitetit për Punë të Jashtme të Parlamentit Evropian (AFET), pasi raportuesi për Kosovën në Parlamentin Evropian, Riho Terras, e pyeti se çfarë po bën Komisioni Evropian në raport me pesë vendet mosnjohëse dhe kur ka diskutuar së fundi me to.

“Sa i përket pesë shteteve mosnjohëse, unë ndjek çfarë po ndodh dhe zhvillimi është inkurajues”, tha Kos, pa dhënë detaje të tjera.

Greqia, Spanja, Rumania, Sllovakia dhe Qiproja janë pesë vendet e BE-së që nuk e njohin pavarësinë e Kosovës, të shpallur më 2008. Mosnjohja nga këto shtete konsiderohet pengesë për avancimin e Kosovës në rrugën evropiane.

Kosova e dorëzoi aplikimin për anëtarësim në Bashkimin Evropian në dhjetor të vitit 2022, por ai ende nuk ka kaluar në fazën e parë formale – shqyrtimin nga Këshilli i BE-së dhe dërgimin për opinion në Komisionin Evropian.

Në të njëjtën mbledhje, Terras e pyeti komisionaren Kos edhe për faktin se ajo ende nuk e ka vizituar Kosovën që nga marrja e mandatit. Kos tha se megjithëse nuk ka qenë në Kosovë, është në kontakt me autoritetet në Prishtinë, ndërsa shtoi se për shkak të situatës politike është detyruar ta shtyjë një vizitë.

Ajo paralajmëroi se pret të qëndrojë së shpejti në Prishtinë, me fokus te reformat që lidhen me Planin e Rritjes të BE-së për Ballkanin Perëndimor.

“Kemi hequr masat dhe presim që Qeveria të vazhdojë me reformat e nevojshme për të përfituar nga mbështetja e BE-së. Së shpejti do të qëndrojë në Prishtinë për ta çuar përpara këtë çështje”, u shpreh Kos.

Më 16 prill, Kosova mori 61.8 milionë euro parafinancim, pasi dorëzoi dokumentet e nevojshme në Komisionin Evropian dhe ratifikoi marrëveshjet e lidhura me Planin e Rritjes.

Pakoja e BE-së për Ballkanin Perëndimor për periudhën 2024–2027 kap vlerën e 6 miliardë eurove. Sipas ndarjeve buxhetore, Kosovës i takojnë rreth 882 milionë euro – 253 milionë euro grante dhe 629 milionë euro kredi – duke e bërë vendin përfituesin më të madh në rajon për kokë banori.

The Geopost