Vuçiqi dramatizon pretendimet për “sabotim” të gazsjellësit, pa ofruar prova publike

Presidenti i Serbisë, Aleksandar Vuçiq, ka rritur tonet alarmuese lidhur me një rast të dyshuar rrezikimi të infrastrukturës së gazit, duke e paraqitur situatën si kërcënim serioz për sigurinë kombëtare, ndonëse pa paraqitur dëshmi konkrete për publikun.

Në një postim në Instagram, Vuçiqi njoftoi se kishte zhvilluar një bisedë telefonike me kryeministrin hungarez, Viktor Orban, të cilin e informoi për atë që e quajti “rezultate të para të hetimit” mbi një incident pranë gazsjellësit Rrjedha e Ballkanit.

Sipas tij, në afërsi të vendbanimit Velebit në veri të Vojvodinës janë zbuluar “dy pako të mëdha me eksplozivë dhe mjete shpërthyese”, duke ngritur dyshime për një tentativë sabotimi.

Megjithatë, ai nuk ka publikuar fotografi, raporte zyrtare apo detaje teknike që do të mundësonin verifikim të pavarur të këtyre pretendimeve.

Në deklaratat e tij publike, Vuçiqi përdori një retorikë të theksuar dramatike, duke thënë se objektet energjetike po mbrohen “në mënyrë që asnjë zog të mos fluturojë”, një formulim që sugjeron një gjendje të jashtëzakonshme sigurie.

Ai gjithashtu paralajmëroi masa të ashpra ndaj autorëve të mundshëm, duke deklaruar se shteti do të veprojë “pa mëshirë” ndaj kujtdo që rrezikon infrastrukturën jetike të Serbisë.

Pavarësisht toneve të forta dhe përshkrimeve dramatike, deri tani mungon transparenca institucionale mbi rastin, ndërsa nuk ka konfirmime të pavarura që mbështesin versionin e paraqitur nga presidenti serb.

Ndërlidhja me zgjedhjet në Hungari

Lideri i opozitës Peter Magjar, i cili konsiderohet favorit në zgjedhjet hungareze të planifikuara për javën e ardhshme, tha se ngjarjet në Serbi me eksplozivët e dyshuar të gjetur përfaqësojnë një “operacion me flamur të rremë”.

Zgjedhjet parlamentare në Hungari do të mbahen fundjavën e ardhshme më 12 prill.

Orbán më parë u bëri thirrje qytetarëve hungarezë që jetojnë në Serbi të ushtrojnë të drejtën e tyre dhe të marrin pjesë në zgjedhje, ndërsa Partia Progresive Serbe dhe Unioni i Hungarezëve të Vojvodinës i nxitën votuesit të votojnë për partinë Fidesz të Orbán.

Politiko raportoi së fundmi se Shërbimi i Inteligjencës së Jashtme SVR i Rusisë po shqyrtonte plane për të rritur perspektivat e kryeministrit hungarez në zgjedhjet e ardhshme, pasi sondazhet tregojnë se fitorja këtë herë do të jetë e vështirë.

Raportohet se oficerët e inteligjencës ruse, si një mënyrë për të rritur vlerësimin e Orbanit, shqyrtuan mundësinë e organizimit të një atentati ndaj tij.

The Geopost