Arrestohen pesë serbë të dyshuar për vrasjet e vitit 1998 në Syriganë të Skenderajt

Policia e Kosovës, në koordinim me Prokuroria Speciale e Republikës së Kosovës, ka realizuar të shtunën një operacion të gjerë policor që ka rezultuar me arrestimin e pesë personave të dyshuar për krime lufte kundër popullatës civile.

Operacioni, i koduar “SYRIGANA”, është zhvilluar pas hetimeve disamujore të Drejtorisë për Hetimin e Krimeve të Luftës, të cilat lidhen me vrasjen e gjashtë civilëve shqiptarë në fshatin Syriganë, në Komunën e Skenderaj, gjatë periudhës maj–qershor 1998.

Sipas njoftimit zyrtar, gjatë hetimeve janë siguruar prova materiale dhe dëshmi të konsideruara relevante, mbi bazën e të cilave janë identifikuar personat e dyshuar dhe është përpiluar kallëzim penal, i dorëzuar në Prokurorinë Speciale.

Pas veprimeve shtesë hetimore dhe në koordinim të vazhdueshëm me prokurorin e rastit, është autorizuar lokalizimi dhe arrestimi i të dyshuarve.

Operacioni policor ka nisur rreth orës 06:00 të mëngjesit dhe është zhvilluar në gjashtë lokacione të ndara, pesë në Komunën e Skenderajt dhe një në Mitrovica e Veriut.

Në aksion kanë marrë pjesë hetuesit e Drejtorisë për Hetimin e Krimeve të Luftës, të mbështetur nga Njësia Speciale Operative.

Gjatë bastisjeve në objektet e banimit dhe objektet përcjellëse, të realizuara me urdhër verbal të siguruar përmes prokurorit special dhe të miratuar nga Gjykata Themelore në Prishtinë – Departamenti Special, janë konfiskuar një armë e gjatë gjysmë-automatike SKS, një armë brezi e tipit Zastava M-57, dy karikatorë dhe 77 fishekë, një pushkë gjuetie me 17 fishekë dhe një rrethatore brezi, si dhe uniforma dhe pjesë të uniformave të ish-ushtrisë jugosllave.

Me vendim të prokurorit special, pesë të arrestuarve u është caktuar masa e ndalimit prej 48 orësh, ndërsa procedurat e mëtejme ligjore do të vazhdojnë në ditët në vijim.

Policia e Kosovës ka theksuar se, në bashkëpunim me Prokurorinë Speciale, mbetet e përkushtuar në zbardhjen e krimeve të luftës dhe në sjelljen e përgjegjësve para drejtësisë, duke garantuar sundimin e ligjit dhe drejtësi për viktimat dhe familjet e tyre.

The Geopost