Fjalimi i fuqishëm i Rubios në Mynih: Evropa është fati ynë i përbashkët, ne jemi fëmijët e Evropës

Sekretari amerikan i Shtetit, Marco Rubio, mbajti sot një fjalim në Konferenca e Sigurisë në Mynih, i cili u prit me duartrokitje nga pjesëmarrësit në sallë.

Gjatë adresimit të tij, ai deklaroi se presidenti amerikan Donald Trump kërkon “seriozitet dhe reciprocitet nga miqtë tanë në Evropë”, duke theksuar rëndësinë e marrëdhënieve transatlantike për të dyja palët.

“Arsyeja, shokë të mi, është sepse na intereson thellësisht. Na intereson thellësisht e ardhmja juaj dhe e jona”, tha Rubio.

Kryediplomati amerikan theksoi se edhe kur lindin mosmarrëveshje mes partnerëve, ato burojnë nga shqetësimi i thellë për të ardhmen e kontinentit evropian dhe jo vetëm nga çështje ekonomike apo ushtarake.

“Ne jemi të lidhur shpirtërisht dhe kulturërisht. Dëshirojmë që Evropa të jetë e fortë. Besojmë se Evropa duhet të mbijetojë… fati ynë gjithmonë do të jetë i lidhur me tuajin”, shtoi ai.

Rubio nënvizoi se stabiliteti i Evropës ka ndikim të drejtpërdrejtë në sigurinë kombëtare të Shteteve të Bashkuara, duke e cilësuar këtë si një nga arsyet kryesore pse çështjet e sigurisë evropiane mbeten prioritet i Uashingtonit.

Ai paralajmëroi gjithashtu se SHBA synon “të rivitalizojë një miqësi të vjetër dhe të rinovojë civilizimin më të madh në historinë e njerëzimit”, duke e lidhur këtë me nevojën për bashkëpunim më të fortë politik dhe strategjik mes dy anëve të Atlantikut.

Sekretari amerikan i Shtetit theksoi rëndësinë e forcimit të aleancës SHBA–Evropë edhe nga perspektiva historike.

“Edhe pse shtëpia jonë është në Hemisferën Perëndimore… ne gjithmonë do të jemi një fëmijë i Evropës. Kolonitë tona të para u themeluan nga kolonistët anglezë, të cilëve u detyrohemi jo vetëm gjuhën që flasim, por gjithë sistemin tonë politik dhe ligjor”, deklaroi ai.

Konferenca e Sigurisë në Mynih, një nga forumet më të mëdha globale për çështjet e sigurisë dhe politikës ndërkombëtare, do të vazhdojë punimet edhe gjatë ditës së sotme dhe të nesërme, me pjesëmarrjen e liderëve politikë, diplomatëve dhe ekspertëve nga mbarë bota.

The Geopost