Trump dhe Xi pajtohen të zbusin tensionet tregtare dhe të “punojnë së bashku” për çështjen e Ukrainës

Presidenti i SHBA-së, Donald Trump, dhe udhëheqësi kinez, Xi Jinping, zhvilluan bisedime në Korenë e Jugut, ku diskutuan për luftën në Ukrainë dhe ranë dakord të tërhiqen nga elementet e luftës së tyre tregtare shkatërruese.

Duke folur në bordin e Air Force One pas takimit të 30 tetorit, Trump tha se kishte pasur një “takim të mahnitshëm” me Xi-në dhe se ata ishin pajtuar për “shumë pika të rëndësishme,” përfshirë marrëveshjet për tregtinë, tarifat dhe mineralet e rralla.

Ai u tha gazetarëve se do të ulë një tarifë ndaj Kinës mbi rolin e saj në krizën e Fentanylit për 10 për qind dhe se Kina do të rifillonte blerjet e “sasive të mëdha” të sojës nga Shtetet e Bashkuara, të cilat ishin ndalur në maj në përgjigje të tarifave të SHBA-së.

Trump shtoi se ishte arritur një marrëveshje edhe për heqjen e kufizimeve kineze mbi rrjedhën e mineraleve të rralla, 17 elemente që luajnë role të vogla por jetike në makina, aeroplanë dhe armë. Përfaqësuesi Tregtar i SHBA-së, Jamieson Greer, i cili ishte gjithashtu në Air Force One, tha se Kina nuk do të vendoste kontrollet e saj të propozuara mbi mineralet e rralla që u zgjeruan në tetor pas një mirëkuptimi midis presidentëve. Ai nuk komentoi mbi kontrollet që tashmë janë në fuqi dhe që u futën në prill.

“E gjithë [çështja] e mineraleve të rralla është zgjidhur, dhe kjo është për botën… Kjo ishte një situatë mbarëbotërore dhe jo vetëm një situatë e SHBA-së,” u tha Trump gazetarëve. “Nuk ka më pengesa nga Kina.”

Trump shtoi se ai diskutoi gjithashtu luftën në Ukrainë të nisur nga Rusia në shkurt 2022, duke thënë se ai dhe Xi ranë dakord të “punojnë së bashku.”

“Ne pajtohemi se palët janë të kyçura në luftime dhe ndonjëherë mendoj se duhet t’i lësh të luftojnë. Por ne do të punojmë së bashku për Ukrainën,” tha ai.

Në komentet e publikuara përmes mediave shtetërore kineze, Xi tha se të dyja palët arritën një konsensus për të zgjidhur “çështjet madhore tregtare” dhe se ekipet kineze dhe amerikane do të vazhdojnë të punojnë për të ofruar rezultate që do të shërbejnë si një “pilulë qetësuese” për ekonomitë e të dy vendeve.

“Kina dhe Shtetet e Bashkuara mund të demonstrojnë së bashku përgjegjësinë që i përshtatet fuqive të mëdha, duke punuar së bashku për të kryer ndërmarrje më domethënëse, praktike dhe të dobishme për të dy kombet dhe për botën,” tha ai.

Takimi në Aeroportin Ndërkombëtar Gimhae të Busanit duket se ka hapur rrugën për një dialog më të gjerë në muajt e ardhshëm, me Trumpin që tha se planifikon të vizitojë Kinën në prill dhe se një marrëveshje e përkohshme tregtare mund të nënshkruhet së shpejti.

Analistët i thanë RFE/RL se shohin hapësirë të kufizuar për një marrëveshje më të gjerë gjatë bisedimeve, por se ulja e tensioneve tregtare mund të hedhë bazat për diskutime drejt një marrëveshjeje më të madhe kur Trump të udhëtojë në Kinë dhe kur pritet që Xi ta vizitojë Shtetet e Bashkuara vitin e ardhshëm.

Pak para se të fillonin bisedimet, Trump njoftoi se ka udhëzuar Pentagonin të ndërpresë menjëherë moratoriumin vullnetar të Uashingtonit për testimin e armëve bërthamore.

Trump tha në një postim në rrjetet sociale se Shtetet e Bashkuara “kanë më shumë armë bërthamore se çdo vend tjetër,” duke përmendur Rusinë si të dytën dhe Kinën “një të tretën e largët, por do të barazohet brenda 5 vjetësh.”

Gjatë bisedimeve, Trump dhe Xi pritej të diskutonin edhe pika të tjera të tensionit, përfshirë Tajvanin dhe mbështetjen e Kinës për Rusinë.

Por Trump tha se Tajvani, i cili vetëqeveriset dhe të cilin Pekini e pretendon si të vetin, nuk u diskutua. Ai shtoi se ai dhe Xi nuk e përmendën blerjen e naftës ruse nga Kina, të cilën Moska e ka përdorur për të ndihmuar në financimin e luftës së saj.

Para takimit, Ukraina dhe aleatët e saj i bënë thirrje Trumpit që të ushtrojë presion ndaj Xi Jinpingut mbi mbështetjen e Kinës për Rusinë. Takimi erdhi një javë pasi Uashingtoni njoftoi sanksione ndaj dy kompanive të mëdha ruse të naftës.

Kina është blerësi më i madh i naftës së papërpunuar ruse dhe ka qenë një mjet jetik për industrinë energjetike të Moskës mes luftës së vështirë të Presidentit rus Vladimir Putin në Ukrainë.