Pas pengesave, forcat ruse rigrupohen pranë Kievit

Forcat ruse që po godasin Kievin po rigrupohen në veriperëndim të kryeqytetit ukrainas, treguan fotografitë satelitore, në atë që Britania tha se mund të ishte përgatitje për një sulm në qytet brenda disa ditësh, raporton Reuters.

Ukraina akuzoi forcat ruse për goditjen e një spitali psikiatrik pranë qytetit të saj lindor, Izyum, të premten, në atë që guvernatori rajonal e quajti “një sulm brutal ndaj civilëve”. Shërbimet e urgjencës thanë se askush nuk u lëndua pasi pacientët tashmë ishin strehuar në bodrum.

Rusia ka goditur qytetet e Ukrainës, ndërkohë që forcat e saj kryesore sulmuese në veri të Kievit kanë mbetur të bllokuara në rrugë që në ditët e para të pushtimit, pasi kanë dështuar në atë që vendet perëndimore thonë se ishte një plan fillestar për një sulm rrufe në kryeqytet.

Imazhet e publikuara nga firma private satelitore amerikane “Maxar” treguan njësi të blinduara duke manovruar brenda dhe nëpër qytete afër një aeroporti në periferi veriperëndimore të Kievit, vend i luftimeve intensive që kur Rusia zbarkoi atje paratrupat në orët e para të luftës./TheGeopost/