Presidenti i SHBA Donald Trump tha se ka të ngjarë të takohet me presidentin ukrainas Volodymyr Zelenskyy javën e ardhshme pasi përpjekjet e SHBA-së për t’i dhënë fund luftës në Ukrainë fitojnë fuqi, dhe Zelenskyy tha se ishte e rëndësishme që të dy të takohen personalisht përpara se Trump të takohet me Presidentin rus Vladimir Putin.
“Unë ndoshta do të takohem me Presidentin Zelenskyy javën e ardhshme,” tha Trump më 7 shkurt. Ai tha se vendi i takimit “mund të jetë Uashingtoni”, duke shtuar: “Unë nuk do të udhëtoj [në Kiev].”
Trump ka premtuar vazhdimisht se do t’i japë fund shpejt luftës së Rusisë kundër Ukrainës, e cila hyn në vitin e saj të katërt në fund të këtij muaji që kur Putin filloi një pushtim në shkallë të plotë të vendit fqinj më 24 shkurt 2022. Ky do të ishte takimi i parë mes të dyve që kur Trump mori detyrën më 20 janar.
Trump foli një javë para fillimit të Konferencës së Sigurisë së Mynihut nga 14 deri më 16 shkurt, ku lufta më e madhe në Evropë që nga viti 1945 sigurisht që do të jetë një nga temat kryesore të diskutimit.
Zelenskyy pritet të marrë pjesë në takimin vjetor, si dhe përfaqësuesi special i Trump për Ukrainën dhe Rusinë, Keith Kellogg.
Trump përmendi përsëri burimet natyrore të Ukrainës dhe tha se donte “një sasi të barabartë të diçkaje” në këmbim të mbështetjes së SHBA. “Ne duam që ata të arrijnë një ekuilibër,” shtoi ai.
“Një nga gjërat që po diskutojmë me Presidentin Zelenskyy është siguria e burimeve të tyre. Ata kanë pasuri nëntokësore, tokë të rralla dhe gjëra të tjera, por kryesisht toka të rralla,” tha ai.
Kellogg mohoi një raport më parë këtë javë se Shtetet e Bashkuara do të paraqisnin një plan paqeje për Ukrainën në Konferencën e Sigurisë në Mynih.
Trump dhe anëtarët e administratës së tij kanë ofruar pak detaje rreth një propozimi konkret për t’i dhënë fund luftës, por Kellogg kohët e fundit tha se të dyja palët do të duhet “të japin pak” ose të bëjnë kompromis.
Zelenskyy tha në një intervistë me Reuters më 7 shkurt se ishte “shumë e rëndësishme” që ai dhe Trump të takoheshin përpara se Trump të takohej me Putinin, sepse përndryshe “do të dukej si një dialog për Ukrainën pa Ukrainën”.
“Mbetet e rëndësishme që partnerët së pari të diskutojnë problemet e tyre dhe më pas të kenë një bisedë me armikun”, citon Reuters të ketë thënë Zelenskyy. Nuk janë bërë të ditura plane konkrete për një takim mes Trump dhe Putin.
Zelenskyy përsëriti thirrjen e tij për garanci të forta perëndimore të sigurisë për Ukrainën, si pjesë e një armëpushimi ose marrëveshjeje paqeje, duke thënë se ishte thelbësore që Perëndimi të vendoste një strategji gjithëpërfshirëse përpara se të zhvillonte bisedime me Moskën, raportoi Reuters.
Zelenskyy tha se ekipi i tij kishte kontakte të rregullta me Kellogg dhe me këshilltarin e Trumpit për sigurinë kombëtare, Michael Waltz.
Lidhjet mes policisë, politikës dhe krimit në Serbi: Kush janë kumbarët e mafias serbe? 
Çfarë thonë për rezolutën e KE-së ata që vuajtën dhunën e regjimit të Vuçiqit? 
Rubio: Irani nuk do të lejohet të vendosë tarifa për anijet që kalojnë në Ngushticën e Hormuzit 
Rikthimi i Janshas në pushtet ngjall shqetësime në BE dhe Ballkanin Perëndimor 
Letonia nënshkruan marrëveshjen e BE-së për kredi mbrojtëse prej 3.5 miliardë eurosh në kuadër të programit SAFE 
Si po shembet strategjia e Putinit për të formësuar politikën jashtë Rusisë?