“Një bombë në mes të Evropës”, ekspertët ndërkombëtarë thonë se Vuçiqi është guvernatori i Putinit në Ballkan

Sipas tyre, konflikti me Kosovën kërcënon të përshkallëzohet, por fuqitë perëndimore shikojnë nga ana tjetër sepse janë të fokusuar në Ukrainë dhe Izrael.

Autorët David Shedd dhe Ivana Stradner, në një shkrim të botuar në revistën gjermane, Cicero, shkruajnë se në fund të shtatorit, Serbia zhvendosi sistemet moderne të armëve në kufirin e saj me Kosovën, një nga vendosjet më të mëdha ushtarake serbe që nga fundi i luftës së Kosovës pothuajse një çerekshekulli më parë.

Në një artikull të përbashkët nga këta dy ekspertë të çështjeve të sigurisë dhe politikës ndërkombëtare thuhet se konflikti Kosovë-Serbi mund të përshkallëzohet për shkak të aktiviteteve destabilizuesve të presidentit rus, Vladimir Putin dhe presidentit serb, Aleksandër Vuçiç, derisa fuqitë perëndimore janë të fokusuara ndaj Ukrainës dhe Izraelit.

Autorët e artikullit të titulluar “Një bombë në mes të Evropës” sugjerojnë se ekzistojnë shumë indikacione se incidentet e fundit në pjesën veriore të Kosovës të banuar me shumicë serbe shkojnë përtej tensioneve të njohura të viteve të fundit, duke përfshirë fushatën dezinformuese të Rusisë për të ngjallur mosbesimin e serbëve të Kosovës dhe për të përhapur mesazhe luftënxitëse.

“Megjithëse ngjarja u anashkalua kryesisht nga mediat perëndimore në atë kohë dhe që atëherë është harruar duke pasur parasysh shpërthimin e luftës midis Izraelit dhe Hamasit – ajo është pjesë e një zhvillimi alarmues në Ballkan”, shkruajnë ata.

Preteksti i menjëhershëm për mobilizimin serb ishin muajt e trazirave mes Kosovës dhe Serbisë, të cilat kanë ruajtur një paqe të brishtë që kur bombardimet e NATO-s në luftën e viteve 1998-1999 i dhanë Kosovës pavarësinë nga Beogradi.

“Në maj, Serbia i vuri trupat e saj në gatishmëri luftarake pasi serbët etnikë që jetojnë në Kosovë u përleshën me policinë e Kosovës. Dhe në shtator, pak para mobilizimit të fundit në kufi, 30 serbë etnikë të armatosur rëndë sulmuan një patrullë policie në Kosovë, duke lënë katër persona të vdekur”, shkruajnë autorët./The Geopost/