Ministrat e Jashtëm të bashkuar në pozicionin e NATO-s ndaj Rusisë

Sekretari i Përgjithshëm i NATO-s, Jens Stoltenberg, zhvilloi bisedime intensive të premten me liderët e vendeve skandinave rreth sigurisë në Evropë, s pasojw e dislokimit të paprecedent ushtarak rus në dhe rreth Ukrainës.

Stoltenberg diskutoi me presidentin finlandez, Sauli Ninisto dhe me kryeministren suedeze, Magdalena Anderson, në mënyrë të posaçme për situatën e sigurisë në Evropën Lindore. Bisedat ndodhën pak para takimit të jashtëzakonshëm të ministrave të jashtëm të vendeve anëtare të NATO-s.

“Kam folur me Presidentin Sauli Ninisto për situatën e sigurisë në Evropë dhe për dërgimin e forcave ruse në dhe rreth Ukrainës”, shkroi Stoltenberg në tuitër, ndërsa i bëri thirrje Rusisë që të de-eskaloj situatën e tensionuar me Ukrainën.

Sekretari i Përgjithshëm kujtoi se NATO vazhdon të koordinohet me partnerin e tyre të ngushtë Finlandën. “NATO e respekton të drejtën e çdo vendi për të përcaktuar qëndrimin e vet”, shkroi Stoltenberg.

Ekonomisti austriak Gunter Fehlinger reagoi ndaj mesazhit të Stoltenber duke i bërë thirrje vendit skandinav që të bashkohet me Aleancën. “Unë i bëj thirrje Finlandës që të anëtarësohet në NATO tani”, tha Fehlinger.

Të njëjtin mesazh Sekretari i Përgjithshëm e dha edhe pas takimit me Andersonin. “Suedia është një partner i vlerësuar i NATO-s dhe ne mbështesim të drejtën e çdo kombi për të vendosur rreth metodave të veprimit rreth sigurisë”, tha Stoltenberg.

Takimi i Këshillit NATO-Rusi është caktuar për 12 janar nga Sekretari i Përgjithshëm i NATO-s për të diskutuar çështjet që lidhen me sigurinë evropiane, veçanërisht për situatën në dhe rreth Ukrainës; si dhe çështje që lidhen me veprimtaritë ushtarake ruse atje.

Në prag të këtij samit, Stoltenberg diskutoi të premten këtë çështje me ministrat e jashtëm të NATO-s.

“Ministrat e Jashtëm të NATO-s qëndrojnë të bashkuar në qasjen tonë ndaj Rusisë”, tha Stoltenberg pas takimit, ndërsa theksoi se Këshilli i ardhshëm NATO-Rusi javën e ardhshme është një shenjë pozitive dhe një mundësi që Moska të tregojë se ka qasje serioze ndaj dialogut e diplomacisë.

Edhe administrata Biden po shkon në bisedimet e javës së ardhshme me Rusinë e pasigurt nëse Moska është serioze rreth negociatave, megjithëse sipas NBC News zyrtarët amerikanë janë të gatshëm të propozojnë opcione për zvogëlimin e dislokimeve të trupave amerikane dhe ruse dhe stërvitjeve ushtarake në Evropën Lindore, me qëllim të de-eskalimit të situatës.