Me thirrjet “Rusia”, “Putin”, këngë për “Kosovën serbe”, disa qindra anëtarë të organizatave kombëtare serbo-ruse para selisë së Parlamentit të Malit të Zi më 2 mars, i dhanë mbështetje Rusisë në luftën kundër Ukrainës.
Në tubim morën pjesë anëtarë të grupeve joformale të afërta me Kishën Ortodokse Serbe, lëvizjet çetnike dhe dega malazeze e grupit të motoçiklistëve “Ujqërit e natës”, organizatë që e ka origjinën nga Rusia.
Të tubuarit kishin veshur tringjyrëshe ruse dhe serbe, u pa flamuri i Perandorisë Ruse, si dhe flamuri çetnik me mbishkrimin “Liri ose vdekje” me kafkë.
Në pankartat shkruhej “Serbët në Mal të Zi, rusët në Ukrainë” dhe “Lutjuni Zotit, e mbajuni me Rusinë”.
Rusia pushtoi Ukrainën më 24 shkurt, pasi mblodhi trupa në kufi javë më parë.
Pushtimi u dënua ashpër nga pothuajse të gjitha vendet e botës, si dhe nga Mali i Zi, dhe Rusisë iu kërkua të ndalonte sulmet dhe të tërhiqte forcat e saj nga Ukraina.
Ata që iu drejtuan të mbledhurve para parlamentit malazez i dhanë një mbështetje të qartë Rusisë dhe fajësuan vendet perëndimore dhe Shtetet e Bashkuara për luftën.
Tubimi në mbështetje të Rusisë dhe Vladimir Putinit zgjati gjysmë ore. Parlamenti malazez ishte i rrethuar me një gardh të dyfishtë metalik dhe pjesëtarë të policisë ishin para ndërtesës së parlamentit. Tubimi kaloi pa incidente.
Një tubim i ngjashëm në mbështetje të Rusisë u mbajt më 28 shkurt në Nikshiq, kur rreth 50 persona mbështetën gjithashtu pushtimin ushtarak rus.
Ministria e Punëve të Jashtme ritheksoi më 1 mars se Mali i Zi vazhdon politikën e përputhshmërisë 100% me politikën e BE-së, duke iu bashkuar masave plotësisht kufizuese, sanksioneve ekonomike dhe individuale të miratuara nga BE kundër Rusisë, pas agresionit ndaj Ukrainës.
Po ashtu, Mali i Zi ishte në mesin e 141 shteteve të OKB-së që kanë votuar pro dënimit të agresionit rus në Ukrainë./RSE
